Ain us waqt say zara pehlay
Jab qiamat uternay wali thi
Dil ki dharti kay saray rastaun per
Aik udasi bikharnay wali thi
Saray imkan bhuj rahay thay jab
Mai nay her cheez us ko lota di
Tund jazbaat mai jo kabhi us nay apni hathailion say
Garam taaza lahu nikaala tha
Aur wo jo khat us nay meri chaahat mai
chuurion say likhay thay
Aur parween ki kaii nazmain
Mai nay her cheez us ko lota di
Aur bhi bohat si cheezain theen
Jin mai chand mehaktay huay tissue paper
Ek deewan mirza ghalib ka
Ek cchalla, ghari, qalam, khushboo
Un-silay suit ka naya kapra
Diary jis kay warq sada thay
Aur wo wishing cards jin ki tehreerain
udas kerti theen meray kamray ko
Mai nay her cheez us ko lota di
kitni baichaargi kay aalam may
us nay mujh say poocha keh
day sako gay kia mujh ko
umar-e-rafta kai wo haseen manzar
sab kay hotay huay bhi jo mai nay
kerb-e-tanhaai mai guzaaray thay
mujh say roothi hui meri sakhian
serdion ki taveel ter raatain
do bers ki tumam needain
beh gaii chashm-e-ghum say ek dua
sab teri bay-rukhi ki nazar hua
mera maazi mera shakista haal
kis terha day sako gay tum mujh ko
meri umar ka saulwan satarwan saaal
jumbsh-e-lab say aankh bharnay tak
us kay dil may jis qasr boojh tha
us nay wo bhi meray supurd kia
choorion say dehaktay hauton tak
us ki har cheez meray pass rahi
ek arsa guzr gia leikin
dil ka yazdaan ab bhi khaali hai
keisay sadion ka bhojh halka ho
meri aankhon may khushk saali hai.

Chund rooz meri jaaN! faqt chund hi rooz

Chund rooz meri jaaN! faqt chund hi rooz
Zulm ki chhaooN mein dam lainy par mujboor hain ham
Our kochh rooz sitam seh lain tarhp leen roo lain
Apny ajdad ki meraas he mujboor hain hum
Jism pe qaid he juzbaat pe zunjireeN hain
Fikr mahboos he guftaar pe taazireen hain
Apni haimmat he keh hum phir bhi jiiye jaty hain
Zindgi kiya kissi muflis ki qabaa he jis mein
Har garhi dard ky peywend lagy jaty hain
Lekin ab zulm ki meyaad ky dinn torhy hain
Ik zara sabr keh faryaad ky dinn torhy hain
Arsa-e-dehar ki jhulsi hoyi weraani mein
Hum ko rehna he par yoonhi to naheen rehna he
Ajnabi hathoon ka benaam garanbaar sitam
Aaj sehna he hameesha to naheen sehna he
Yeh tery khusn pe lipti hoyi aalaam ki gard
Apni do rozah juwani ki shakustooN ka shumaar
Chandni ratooN ka bekaar dehkta howa dard
Dil ki besood tarhap jism ki mayoos pukaar
chund roz meri jaan! faqt chund hi roz

hum bichhar jaen ge

Mery pesh-e-nazar — Aaeye mery humsafar
He yehi eik ghum —- Hum bichhar jaeen gy
Meri afsurdgi —– Dekh kar her gharhi
Kehti he chushm-e-nam – Hum bichhar jaeen gy

Aansuoon mein meri—– umrr beh gaye gi
Tum chaly jaoo gy —– yaad reh jaye gi
Tum ny yeh kiya kiya — mujh ko batla diya
Kochh dinoon mein sanam- Hum bichharh jaeen gy

Kal nah jany kahan — our kis haal mein
Tum uljh jaoo gy —– waqt ky jaal mein
Kal bhula kar utho — Saath mery chaloo
Aaj to do qadam —– Hum bichharh jaeen gy

yeh khushboo ka safar

Chhorh peman-e-wafa ki baat, sharmindah nah kar
DoriyaaN, mujboriyaaN, ruswaiyaaN, tanhaiyaaN
Koi qatil, koi bismil, siskiyaaN, shehnaiyaaN
Dekh yeh hansta howa mosam he mozo-e-nazar
Waqt ki roo mein abhi sahil, abhi mouj-e-fana
Eik jounka, eik aandhi, ik kiran, ik jowy-e-khooN
Hath hathhooN ka asasa, hath hathooN sy juda
Jub kabhi aaye ga hum per bhi judai ka samaaN
Toot jaye ga mery dil mein kissi khuwahish ka teer
Beegh jagy gi teri aankhooN mein kajal ki lakeer
Kal ky aandeshooN sy apny dil ko aarzadah nah kar
dekh yeh hansta huw mausam, yeh khushboo ka safar

Ye weham nahi to kya hey, ye gumaaN nahi to kya hey

Ye weham nahi to kya hey, ye gumaaN nahi to kya hey
ye jo dil sey utth raha hey, ye dhuwaaN nahi to kya hey

tujhey kis dard ka rishta merey dar pe kheyNch laaya
tujhey kis ney keh diya tha merey paas har dawaa hey

terey kisi dukh ka chaaraa merey haath meiN nahi hey
meiN to khud bekaraaN hooN merey paas kya dharaa hey

abhi bastiyaaN yaheeN heiN, tu loat jaa yaheeN sey
merey saath saath na chal tu, ye bohat barra juwa hey

tujhey kya khabar aey hamdam ke teri aarzu ke badly
merey dil pe jo laga tha, ab tak wo zakhm haraa hey

par gila nahi hey tujh sey, merey khaloos meiN hi kami hey
meiN ney jisey bhi dil sey chaaha, usey laga ke wo khuda hey

meiN koi waaqeya nahi hooN, mujhey is tarhaN na socho
meri daastaaN ko chorro, bhala is meiN kya maza hey

tu laot ke aa gayaa hey, par mera dil to bujh chuka hey
ab tu kisi aur sey pyaar kar ley, bas yehi teri sazaa hey

By: Amal

waqt say kon kahay yaar zara ahista

waqt say kon kahay yaar zara ahista
gar nahin vasal to yeh khuaab-e-rafaaqat hi zara dair rahay
waqfa-e-khuaab kay paaband hain
jab tak ham hain
yeh jo toota to bikher jaaeyn gay saaray manzar
(teergi-zaad ko moj hay fana ki taleem)
hast aur naist kay maabain agar
khuwaab ka pal na rahay
kuch na rahay
waqt say kon kahay
yaar zara aahista…

Amjad Islam Amjad

:)

Sath Chalnay Walay Jab

Sath Chalnay Walay Jab

Sath Chore Jatay Hain

Waqt Thum Nahi Jata

Koi Jay To Zindgi Nahi Rukti

Raston Ko Chalna Hai

Rastay To Chaltay Hain

Yaar Dost Miltay Hain

Zakhum Aisy Siltay Hain

Ghard Ghard Lamhon Main

Umar Kat Hi Jati Hai

Kuch Mosafron Ko Bas Manzilan Nahi Milteen

Yaad

Mai baarishon mai jo yaad aaoon
to soch laina
keh iss ki boondon mai mairay ashkon nay ghar kiya hay
safar kiya hay……asar kiya hay
mai baarishon mai jo yaad aaoon
to soch laina
keh bheegay mausam nay maira aanchal bhigo diya hay
thaa dard-e-hijraaN barra hi qaatil
woh meray dil mai sumo diya hay
tumharay waadon ka tha mehal jo,
thi uss ki bunyaad paaniyon per
yehi sabab hay keh taiz lehroN nay uss ko aakhir,
dubo diya hay
mai baarishon mai jo yaad aaoon,
to soch laina

Fakhira Batool

Sheher Ke Dukandaron

Shehar Ke Dukandaro Karobaar-E-Ulfat Mein Sood Kia Zian Kia Hai, Tum Na Jaan Pao Gay
Dil Ke Daam Kitne Hein Khuwab Kitne Mehnge Hein Aur Naqd-E-Jaan Kia Hai Tum Na Jaan Pao Gay
Sheher Ke Dukandaron, Sheher Ke Dukandaron

Koi Kaisay Milta Hai Phool Kaisay Khilta Hai Aankh Kaisay Jhukti Hai Saans Kaisay Rukti Hai
Kaisay Reh Nikalti Hai Kaisay Baatein Chalti Hai Shouq Ki Zabaan Kya Hai, Tum Na Jaan Pao Gay
Sheher Ke Dukandaron, Sheher Ke Dukandaron

Wasl Ka Sukoon Kya Hai, Hijr Ka Junoon Kya Hai, Husn Ka Fusoon Kya Hai, Ishq Ke Daroon Kya Hai
Tum Mareez-E-Danai Maslihat Ke Shaydai Raah-E-Gumrahan Kya Hai, Tum Na Jaan Pao Gay
Sheher Ke Dukandaron, Sheher Ke Dukandaron

Zakhm Kaisay Phaltay Hein Daagh Kaisay Jaltay Hein Dard Kaisay Hota Hai Koi Kaisay Rota Hai
Ashq Kia Hai Nalay Kia Dasht Kia Hai Chalay Kia Aah Kia Fughaan Kya Hai, Tum Na Jaan Pao Gay
Sheher Ke Dukandaron, Sheher Ke Dukandaron

Namuraad Dil Kaisay Subah Shaam Kartay Hein Kaisay Zinda Rehtay Hein Aur Kaisay Martay Hein
Tum Ko Kab Nazar Aayi Ghamzadoon Ki Tanhai Zeest Be-Umaan Kia Hai, Tum Na Jaan Pao Gay
Sheher Ke Dukandaron, Sheher Ke Dukandaron

Janta Hoon Mein Tum Ko Zouq-E-Shaiyri Bhi Hai Shaksiyat Sayjanay Mein Ik Yeh Mahiri Bhi Hai
Phir Bhi Harf Chuntay Ho Sirf Lafz Suntay Ho In Ke Darmiyaan Kya Hai, Tum Na Jaan Pao Gay
Sheher Ke Dukandaron, Sheher Ke Dukandaron

Ruke Ruke se qadam

ruke ruke se qadam, ruk ke baar baar chale
qaraar leke tere dar se, beqaraar chale
ruke ruke se qadam, ruk ke baar baar chale
ruke ruke se qadam……

subah na aayi kai baar neend se jaage
ki ek raat ki ye zindagi guzaar chale
ruke ruke se qadam………

uthaaye phir thay ke ehasaan dil ka seene par
le tere qadamon pe ye karz bhi utaar chale
qaraar leke tere dar se, beqaraar chale
ruke ruke se qadam, ruk ke baar baar chale
ruke ruke se qadam………..

figaar paooN mere, ashk naarisa mere

figaar paooN mere, ashk naarisa mere
kahiN tou mil mujhay ay gumshuda khuda mere

meiN shamma-e kushta bi tha subh ki naveed bi tha
shikast meiN koi andaaz dekhta mere

wo dard-e-dil meiN mila, soz-e-jism-o-jaaN meiN mila
kahaN kahaN ussay doonDha jo saath tha mere

her ik ke sheyr meiN maiN us ka ux dekhta hooN
meri zabaaN se jo ish’aar le gaya mere

safar bi meiN tha musafir bi meiN tha rah bi meiN
koi nahiN tha kaRe kaus ma’siva mere

wafa ka naam bi zinda hei mein bi zinda hooN
abb apna haal suna mujh ko bewafa mere

wo chaaragar bi ussay daer tak na pehchaana
jigar ka zakham tha naghmooN meiN dhal gaya mere

main bhala kon hoon

main bhala kon hoon
tum nay daikha hay kabhi meri taraf
kon hoon mai
kitni mazboot nazar aati hoon (bazaahir)
kabhi bargadd kay ghanay pairr kay saaey jaisi
kabhi ustaada makaan ki soorat
aur kabhi naram bichhonay ki tarah
subah ki lau ki tarah
tund mojon mai muhabbat kay kinaaron ki tarah
kon hoon mai
tum nay daikha hay kabhi mairi taraf
aanhk say door kahin rooh kay teh-khaanay mai
tootay phootay say khilonay apnay
main nay tum sab say chhupa rakhay hain
tumhay maloom hay mujh mai koi kehta hay
rooh kay qufal ko torron ik din
apni khuwahishon ka dereecha kholoon
aur ji bhar kay khuli hawa mai khailoon…

jab nahi aaye thay tum tab bhi to tum aaye thay

jab nahi aaye thay tum tab bhi to tum aaye thay
aankh mein noor ki aur dil mein lahu ki surat
yaad ki tarha dharaktay huay dilki surat

tum nahi aaye abhi phir bhi to tum aaye ho
raat k seenay mein mehtab k khanjar ki tarha
subh k haath mein khursheed k saagar ki tarha

tum nahi aao ge jab phir bhi to tum aao ge
zulf dar zulf bikhar jayega phir raat ka rang
shab-e-tanhayee mein bhi lutf-e-mulakat ka rang

aao aane ki baat karen keh tum aaye ho
ab tum aaye ho to konsi shay nazr karoun
keh meray paas siwaye mehr-o-wafa kuch bhi nahi
aik dil aik tamanna k siwaye kuch bhi nahi

baadal kay aur beher kay rishtay ajeeb hain

baadal kay aur beher kay rishtay ajeeb hain
kaali ghatta kay dosh pay berfon ka darakht hay
jitnay zameen pay behtay hain derya sabhi ka rukh
ik beher-e-bay-kinaar ki manzil ki simt hay
khuwabon mai aik bheegi huwi khush-dili kay saath
milti hay aashna say koi ajnabi si moj
baadal bhanwar kay haath say laitay hain apna rizq
phir uss ko baantetay hain ajeeb bay-rukhi kay saath
jungle mai sehan-e-baagh mai shehron mai dasht mai
chashmon mai aabshaaron mai jheelon kay tasht mai
gaahay yeh os ban kay sanwertay hain berg berg
gaahay kisi ki aankh mai bhertay hain iss tarah
aansu ki ik boond mai dajla dikhai day
aur doosray hi pal mai jo daikho to door tak
raig-e-rawaan dard ka sehra dikhaaee day
baadal kay behar kay jitnay hain silsilay
mujh say bhi teri aankh kay rishtay wohi to hain

Amjad Islam Amjad