Sochtaa hooN key mohabbat sey kinaaraa kar luuN
Dil ko begaanaa-e-targheeb-o-tammanaa kar luuN
Sochtaa hooN key mohabbat hai junuun-e-rusvaa
Chandd bekaar-se behuudaa KhayaaloN kaa hujuum
Ik aazaad ko paaband banaaney ki havass
Ik begaaney ko apnaaney ki say’ee-e-maouhuum
Sochtaa hooN key mohabbat hai suruur-e-masti
Iski tanveer mey raushan hai fazaa-e-hasti
Sochtaa hooN key mohabbat hai bashar ki fitrat
Iskaa mitt jaanaa, mitaa dainaa bohot mushkil hai
Sochtaa hooN key mohabbat sey hai taabindaa hayaat
Aap ye shamaa bujhaa denaa bohut mushkil hai
Sochtaa hooN key mohabbat pey karee sharteyN haiN
Ik tamaddun mey masarrat pey baree sharteyN haiN
Sochtaa hooN key mohabbat hai ik afsurdaa see laash
Chaadar-e-izzat-o-naamuus mey kafnaayi huee
Daur-e-sarmaayaa ki raundi huee rusvaa hasti
Dargah-e-mazahab-o-ikhlaaq se thukaraayi huee
Sochtaa hooN key bashar aur mohabbat kaa junuuN
Aisi boseedaa tamaddun sey hai ik kaar-e-zabuuN
Sochtaa hooN key mohabbat na bachey gee zindaa
Pesh-az-waqt ki sarh jaaye ye galtee huee laash
Yehi behtar hai ki begaanaa-e-ulfat ho karr
Apne seeney mey karuuN jazb-e-nafrat ki talaash
Aur saudaa-e-mohabbat sey kinaaraa kar luuN
Dil ko begaanaa-e-targheeb-o-tamannaa kar luuN…
Posted in Urdu Poetry
