Hyaat Key Ujrey Dyaar Mein Kuch Taarekiyaan Abhi Aur Hain
Naseeb Key Bigrey Nisaab Mein Kuch Talkhiyaan Abhi Aur Hain
Main Ney Phir Sey Tinkey Jorr Kar Socha K Banaaon Aik Ghar
Mujhey Tabhi Falaq Sey Nawa Milli Key Wahaan Badliyaan Abhi Aur Hain
Yahi Dekh Ab K Teray Khwaab Sab Kyon Dhal Gye Hain Saraab Mein
Dil E Be Khabar Zara Hosh Kar K Teray Imtehaan Abhi Aur Hain
Wo Daagh Yaadon Key Bad Numaan Too Ney Mitaaye To Hain Par Sab Nahi
Maseeha E Waqt Meray Zehan Par Aisay Kuch Nishaan Abhi Aur Hain
Aey Toofan E Hawa Zara Phir Sey Aa In Bastiyon Mein Har Us Jaga
Jahaan Bach Gye Hain Chand Ghareeb Aisey Kuch Makaan Abhi Aur Hain
Main Chaahon Agar Bhi To Kis Trah Supurd E Ajal Ho Jaaon Abhi
K Is Soukhta Jaan Key Hisaab Mein Qarz E Dostaan Abhi Aur Hain
Abhi Khwaahishon Mein Lagey Raho Zara Saans Lainey Ko Ruko Nahii
Mujhey Hai Yaqeen Yahien Aass Pass Naye Aasmaan Abhi Aur Hain
