tum abr-e-gurezaN ho

tum abr-e-gurezaN ho
men sehra ki maanind hon
do boond jo barso gay
bekaar men barso gay

hai khushk bohot mitti
har simt bagoolay hen
sehra k bagoolon se
uth’tay hi to sholay hen
tum khul k agar barso
sehra men gulistaN ho
par tum se kahen kaisay
tum abr-e-gurezaN ho

jal thal jo agar kar do
tan-man men nami bhar do
hai khushk bohot mitti
poori jo kami kar do
mil jao agar hum ko
hum jashn manaein gay
dharti ne na dekhay hon
wo phool khilaein gay
aankhon men ujaalay hon
or dil mein chiraaghaN ho

par tum se kahen kaisay
tum abr-e-gurezaN ho …

Mere Khuda! maiN zindagi ke azab likhoon ya Khuvaab likhoon

Mere Khuda! maiN zindagi ke azab likhoon ya Khuvaab likhoon
yeh mera chehra, yeh meri aankhaiN
bujhey hoey haiN chiragh jaisey
jo phir se jalney ke muntazir haiN

Voh chaand chehra, sitara aankhaiN
voh meherbaaN, saaya_dar zulfaiN
jinhooN nay paimaaN kiye thai mujh se
rifaqatooN ke, mohabbatooN ke
kaha tha mujh se ke aaey musafir, raah-e-vafa ke
jahaN bhi jaey ga hum bhi jaingaiN saath tere
banaigaiN ratooN maiN chandni hum
to din main saeey bakhair daiN gaiN

voh chaand chehra, sitara aankhaiN
voh meherbaaN saaya_dar zulfaiN
voh apney paimaaN rifaqatooN ke, mohabbatooN ke
shikast kar gaey haiN
najaney abb kis kis reh_guzar ka minarah-e-rooshni hoey haiN
magar musafir ko kia Khabar hai
voh chaand chehra to bujh gaya hai
sitara aankhaiN to so gai haiN
voh zulfain bay_saya ho gai haiN
voh rooshni aur voh saey meri aata` thai
so meri rahooN maiN aaj bhi haiN
ke maiN musafir raah-e-vafa ka

voh chaand chehra, sitara aankhaiN
voh meherbaan saya_dar zulfaiN
hazaroon chehrooN, hazarooN aankhoon
hazarooN zulfoon ka ek sailaab-e-tund lay kar
mere tauqub maiN aa rahey haiN
her ik chehra hai chaand chehra
haiN saree aankhain sitara aankhaiN
tamam haiN saya_dar zulfaiN
maiN kisko chahooN
maiN kisko poojooN
maiN kis ke saaey main baith jaooN
bachooN ke toofaaN maiN doob jaoooN
ke mera chehra, na meri aankhaiN

Mere Khuda! maiN zindagi ke azab likhooN ya Khuvaab likhooN

merey Ehsaas ko pathar bana daalo…….

Hawaa-e-Shehr-e-JanaaN
kuch kaho na kiya kahaa uss ney?
ussey tumney meri aankhoN ki weerani bataai tou?
wuh kyaa bolaa…….?
ussey tumney kaha hogaa k meri har Duaa ki
ibtidaa aur intehaa wuh hey
ussey ye bhii bataana thaa………..
k usski ik khushii ka moul meri Zindagi Thehrey
tou sodaa phir bhi sastaa hey
ussey merey muqadar k
sabhi roshan sitaarey sounp kar kahtii
sitaaroN ka Thihkaana tou azal sey aasmaaN hey
aur merey aasmaaN tum ho
ussey wuh saarey mousam
jinkey lehjey Rung aur khushboo sey bheegey heiN
thamaa kar itna kahna thaa
khizaaN maiN khud pe jhailooN gii
hawaa meri saheli ………
kuch tou bolo k wuh kaisa hey?
kaho na kya kahaa ussney?
koi paiGhaam tou hogaa?
jo merey naam bhejaa ho
hawaa………..ye kyaa??
tumhaari aankh meiN aansoo
tumhaarey honT neeley paR rahey heiN kyuN?
tumhaarey jism meiN larzish
chhaTakhtey aainoN si khudkalaami meiN
ye mujhsey kyaa kahaa tumney?
k tum iss shahr-e-sanG ki
oonchii faSeeloN sey
buhat hi deir tak Takraa k thak kar louT aai ho
k shahr-e-dilbaraaN k
har dareechey, dar, Galii koochhey pe pehrey heiN
tumheiN merey payaamoN ka jawaab iss koo’ey jaanaaN sey
FaQat ik sard aur be-ant Khamoshii ki Surat meiN mila hey
Hawaa-e-shahr-e-jaanaaN……
na-samajh ho tum…..tumheiN shaaid pataa bilkul nahi hey
k khaamoshii………..
samandar ki tarha gehrey taa’aluQ ki bazaat-e-khud gawaahi hey
chalo aao….. merey kaandhey sey lag kar ghum bahaa daalo
merey seeeney meiN Thandii aah ban kat iss tarhaa utroo
merey Ehsaas ko pathar bana daalo…….

Mataa-e-zeest

meray ajnabi
meray bay-khabar
meray haath meiN kahaan ye hunar
k main beech raah sey wapsi ka
khayaal dil mein bhii la sakuN
tumhain chohR kar kisi moR par
kisi aur rastay pe jaa sakuN
meray chaara-saz-o-rafiq-e-jaaN
meray ajnabi meray aashna
koi aisa wesaa gumaN na kar
mujhay teray sath sey baRh k tou
kisi hamsafar ki talab nahi
k jo haath main tera hath hey
tou safar hii meri hayaat hey
ye safar thamay ga….
tou mera naam-o-nishaN kahan?
meray hamsafar
main teray bina
kahiN moat-o-zeest k darmiyaaN
na zameen meri na aasmaaN
meray badgumaaN meray mehrbaaN
meray raah-bar
meri iltajaaoN pe dhiyaaN kar
meri zindagi k safar ko dil sey dawam day
meri manziloN ko dhuwaaN na kar
tera saath hey meri zindagi
mujhay is tarah be-amaaN na kar……..