tujh ko darya ne jo dekha hai idhar atay huay


tujh ko darya ne jo dekha hai idhar atay huay
kuch bhanwar doob gaye aab main chakratay huay

hum ne to raat ko daanto’n se pakar rakha hai
chheena jhapti main ufaq khulta gaya jatay huay

jhhap se utar jaati hai paani main gulnaar shafaq
surkh ho jatay hain rukhsaar bhi sharmatay huay

main na hoon ga to khizaan kese katay gi teri
shokh pattay ne kaha shaakh se murjhatay huay

hasratain apni bilaktee’n na yateemo’n ki tarah
hum ko awaz he de letay zara jatay huay

see leay hont wo pakeeza nigahain sun ker
meli ho jati hai awaz bhi dohratay huay

(Gulzar)

Mujhay kuch dair sonay day


Suno!
Main thak gaya hoon
Meri Palkoon pe ab tak kuch adhooray khawaab jaltay hain
Meri neendoon main tairay wasl ka raisham ulajhta hai
Mairay ansoo mairay chehray pe tairay ghamm ko likhtay hain
Mairay ander kai sadiyun kay sannatoon ka daira hai
Maiary alfaaz baahain wa kiya mujh ko bulatay hain
Mager main thakk gaya hoon
Aur main ne khamashi ki goad main sir rakh dia hai

Main baloon main
Tumharay hijr kee narm ungliyan mehsoos kerta hoon
Meri palkoon pe jaltay khawaab hain ab raakh kee soorat
Tumharay wasl ka raisham bhee ab neendain nahin bunta
Mairi aankhon main jaisay THAR kay mausam ka basaira hai
Mujhay ander kay sannatoon main gehri neend aai hai
Suno!
Iss yaad se keh do
Mujhay kuch dair sonay day

Meri palkon ko mat daikho


 

Meri palkon ko mat daikho

in ka uthna, in ka jhapakna

jism ka na mehsoos amar hai

 

meri ankhon ko mat daikho

in ki aut main shaam-e-ghareeban

in ki aarr main dasht-e-azal hai

 

mere chehray ko mat daikho

iss main koi wada-e-farda

iss main koi aaj na kal hai

 

ab us darya tak mat aao

jis ki lehrain toot chuki hain

uss seenay se lau na lagao

jis ki nabzain choot chuki hain

 

ab mere qatil ko chaho

mera qatil marham marham

darya darya, saahil saahil

 

qazi-e-shehr ka matha chomo

jis ke qalam main zehr-e-hilahil

jis ke sukhan main lehn-e-silasil

ab  us raqs ki dhun par nacho

jis ke gat per lut gaya qazi

jis ki lai par bik gaya qatil

bik gaya qatil !!!!!!!

Rishta’-e- JaaN


Rishta’-e- JaaN

Ussey meiN saans kehti thi
magar saanseiN humesha sey mujhey mushkil hi lagti hein

ussey meiN Zindagi kah kar bulaati thi
magar ye zindagi kuch ba-wafa hoti tou wuh bhi phir wafa karta

ussey Dil bhi kaha meiN ney
magar ye Dil zara sii Theis paa kar apni hasti bhool jaata hey

ussey Ehsaas ki Khushbu bhi likha tha
magar Khushbu ka koi ghar …..nahi hota

ussey meiN deep kahti thi
magar Zaalim hawaa sey dosti meri kahaaN mumkin

ussey meiN ney Sitaara bhi kahaa ik Shab
magar aankhoN meiN koi aasmaaN hota tou wuh in meiN utarta bhi

ussey ik din kahaa meiN ney………suno tum Chaand jaesey ho
magar meiN khud ko saagir………….. kis tarah karti?

ussey meiN ney kahaa baadal
magar Sehra ki qismat meiN kabhi baarish nahi hoti

ussey meiN ney maseeha bhi tou jaana thaa
magar zakhmoN ki had hoti…..tou wuh darmaaN koi karta

ussey meiN ney kaha suraj
magar meiN moum thii…uski tamazat kis tarah sehti

ussey meiN ney Dua kah kar pukaara tha
magar meri duaaoN ko, dar-e-maqbool tak janey ka rasta hi nahi aata

phir ik din jaaney kaesey…….?
dard mosam likh diyaa ussko
issi mosam sey ab mera
ta’aluQ Umr bhar ka hey
wafaa ki har kasoTi par….ussey iss Dil ney parkha hey

kabhi tum laut ke aao


kabhi tum laut ke aao
mujhay bus itna samjhao
kahan se seekh li tum ne,
ada mujh ko bhulane ki

tumhain mujh se jo shikwa tha
ya koi bhi shikayat thi
na ki koshish batanay ki
bhala yun chor ke apna
koi apnon ko jata hai

musalsal dukh ki barish main
yun jeevan bhar rulata hai
abhi tau rait geeli hai
banay apnay gharondon ki
abhi sub naqsh baqi hain
gaye qadmon pe laut aao

mujhay bus itna samjhao
kahan se seekh li tum ne
ada mujh ko bhulanay ki

chand ash’aar


Nahin fursat yaqeen mano hamain kuch aur karne ki

teri baatain, teri yadain, bohot masroof rakhti hain

—————————–

tumhain jo be sabab mujh se khafa honay ki aadat hay,

ye aghaz-e-judai hai ya andaz-e-muhabbat hay

————————-

faqat kehne ki batain hain nibhata kon hay kis ko

chalo ab dekh letay hain manata kon hai kis ko !

Tu Is Qadar Mujhe Apne Kareeb Lagta Hai


 

 

 

Tu Is Qadar Mujhe Apne Kareeb Lagta Hai
Tujhe Alag Sa Jo Sochun Ajeeb Lagta Hai

Hadood-E-Zaat Se Bahar Nikalke Dekh Zara
Na Koi Gair, Na Koi Raqeeb Lagta Hai

Jise Na Husn Se Matlab Na Ishq Se Sarokar
Wo Shakhs Mujhko Bahut Badnaseeb Lagta Hai

Ye Dosti, Ye Marasim, Ye Chahatein Ye Khaloos
Kabhi Kabhi Ye Sab Kuch Ajeeb Lagta Hai

Ufaq Pe Door Chamakta Hua Koi Taara
Mujhe Charag-E-Dayaar-E-Habeeb Lagta Hai

Na Jaane Kab Koi Tufaan Aayega Yaaron
Buland Mauj Se Saahil Qareeb Lagta Hai

ab bhala chhor k ghar kia kartay


 

 

ab bhala chhor k ghar kia kartay
Shaam k waqt safar kia kartay

Tairi masroofiyatain jantay thay
Apnay aanay ki khabar kia kartay

Jab sitaaray hi nahi mil paaey
Lay k hum Shams- o- Qamar kia kartay

Woh musafir hi khuli dhoop ka tha
Saaey phaila k shajar kia kartay

Khaak hi awwal-o-aakhir thehri!!!
Kar k zarray ko gohaar kia kartay

Raaey pahlay sy hi bana li tu nay
Dil main aab hum tairy ghr kia kartay

Ishq nay saaray saleekay bakhshay
Husan say kasb-e-hunar kia kartay

 

(Parveen Shakir)

Phir payar kise tum kehte ho !


Phir payar kise tum kehte ho!
Khamosh zuban k lafzon men
Kuch poshida si baten hen
In poshida se baton men
Kuch chahat ki barsaaten hen
In baton ko hum mudaat se
Seene men chupa k bethe hen
Kuch pae bina
Kuch kho dena
Ye payar men hum ne seekha hy
Soraj men chand sitaron men
Har shay men tumhi ko dekha hy
Dharkan men b naghma ban kar
Sagar ki tarha tum behte ho
Ye payar nahi to tum hi kaho
Phir payar kise tum kehte ho !

Akhan cham cham – tina sani


 

 

 

Ankhan cham cham wasiyan
Dilan dian galan dilan wich reh gayan wey,
Na tu sunian, na dasian
Ankhan cham cham wasiyan
Nikee jaiee jindaree noo rog kee ae la liya
Channa pardaisian noo meet kyon bana liya
Sochan wich dubhe howee Wang main sadayan wey
Kadee rowein, kadee hansian
Ankhan cham cham wasiyan
Kairee gal mahia wey tu mukh san tow moria
Dil sada gumman dey samandaran che roria
Aisey dil chundrey dey akhey kano lug ke
Dukhan witch main phasian

Ankhan cham cham wasiyan
Tu na jadoo pas channa, kee ae saday pas ve
Din wee udas saday, raatan vi udas ve
Lut giyan chain sada, Rus gaye hasay ve
Khushian ne door nasiayan

Ankhan cham cham wasiyan ..

Dasht-e-tanhai maen


 

 

Dasht-e-tanhai maen aye janey jahan larzaan haen
teri awaaz k saye terey honton k sarab
Dasht e tanhai maen doori k khaso khak taley
Khil rahey haen terey pehloo k samaan aur gulab
Dasht-e-tanhai maen …….
Uth rahi hae kaheen qurbat sey teri saans ki aanch
Apni khushboo maen sulagti hui madham madham
Door ufaq par chamakti hui qatra qatra
Gir rahi hae teri dildar nazar ki shabnam
Dasht e tanhai main…..
Is qadar piyar sey aye jan e jahan rakha hae
Dil k rukhsar pe is waqt teri yaad ney haath
yeun guman hota hae gar che abhi hae subh faragh
Dhal gaya hijr ka din aa bhi gai wasal ki raat
Dasht tanhai main…..

 

 

Woh jo hum maiN tum maiN qarar tha tumhaiN yaad ho keh nah yaad ho


 

Woh jo hum maiN tum maiN qarar tha tumhaiN yaad ho keh nah yaad ho
Wohi waada yaani nibah ka TumhaiN yaad ho keh na yaad ho

Woh jo lutf mujh peh thay peshtar Woh karam keh tha mray haal per
Mujhay sabb hay yaad zara zara TumhaiN yaad ho keh na yaad ho

Woh naay gilay woh shikaayateN Woh mazay mazay ki hikayateN
Woh har ik baat peh roothna TumhaiN yaad ho keh na yaad ho

Hooay ittefaq say gar baham To wafa jatanay ko dam badam
Gila-e-malamat-e-aqrabaa TumhaiN yaad ho keh na yaad ho

Koi baat aisee gar hooee Keh tumharay jee ko buree lagee
To bayaN say pehlay hee bhoolna TumhaiN yaad ho keh na yaad ho

Kabhi hum maiN tum maiN bhi chah thee Kabhi hum maiN tum maiN bhi rah thi
Kabhi hum bhi tum bhi thay aashnaa TumhaiN yaad ho keh nah yaad ho

suno zikar hai kai saal ka ke kiya ik aap ne waada tha

sau nibhahnay ka tau zikar kaya tumhain yaad ho ke na yaad ho

Woh bigarnaa wasl ki raat ka Woh naa ma’an-na kisi baat ka
Who nahiN nahiN ki har aan adaa TumhaiN yaad ho keh nah yaad ho

Jisay aap gintay thay aashnaa Jisay aap kehtay thay baawafa
MaiN wohi hooN Momin-e-mubtalaa TumhaiN yaad ho keh nah yaad ho

Gali kuchon mein barg-e-khushk ki soorat bikharna tha


Gali kuchon mein barg-e-khushk ki soorat bikharna tha
Hawaa se dousti kaa koi tu anjaam honaa tha

Junoon ke shaher mein lakin hamari haar lazim thi
Idhar aik shaira thi uss taraf sara zamanaa tha

Ye saari umr kis aashfatgi mein raaigaan kar di
Ussi ko yaad rakha hai jise dil se bhulana tha

Ajab wahshat ka alam hai samajh mein kuch nahin ataa
safar ki shab musafir ko kahan khaima lagana tha

Diye jo baam per rakhay thay meinne bujh gaye saarey
Issi taareek shab mein uss ko mere gaoon ana tha

Wo jab oajhal houa tu hum bhi apne aap se chounkey
“Ussey awaaz dena thi ussey wapis bulana tha”

BichaRney sey zara pehley


BichaRney sey zara pehley
agar wuh Izn-e-Goyaai mujhey deta
mujhey ussko bataana tha…
k meiN usski hatheli par
adhoorey khaab rakh kar bhool aai huN
meiN usski reh-guzaaroN meiN
ussey aankhoN meiN bhar leney ki hasrat bhool aai huN
agar wuh bolney ka Izn deta tou
mujhey ussko bataana tha…….!!
k meiN usskey liye alfaaz ki maala piroti thi
magar ab be-hunr honToN ko Goyaai nahi milti
mujhey ussko bataana tha
meri AankheiN agar ussko na dekheiN tou
buhat Be-Noor rehti heiN
koi manzar bhi taGhyaani k aagey ruk nahi paata
mujhey ussko bataana tha….!
k usskey saath ka matlab hi meri zindagaani hey
bina usskey meri har saans
meri raaegaani hey…..!

Meri Baat Baat Main Roshni Mere Harf Harf Main Dilkashi


Meri Baat Baat Main Roshni Mere Harf Harf Main Dilkashi
Tu Mere Shareek-E-Wisaal-E-Jaan Meri Her Kitaab Main Reh Gaya

Koi Phool Khil K Bikhar Gaya Koi Baat Ban K Bigar Gai
Na Sawal Koi Labon Pe Hai Na Gila Jawab Main Reh Gaya

Dil Khush-Gumaan Teri Khair Ho Tu Hai Phir Yaqeen Ki Saleeb Per
Tujhey Phir Kisi Se Shikayaten Tu Isi Azab Main Reh Gaya

Tujhey Kya Mila Dil-E-Mubtila Na Koi Dua Na Kahin Wafa
Magar Ik Arsa-E-Raigaan Jo Tere Hisaab Main Reh Gaya

Woh Jo Mera Aehd-E-Jamal Tha Woh Jo Mera Shehr-E-Khyaal Tha
K Ab Us Ka Zikr-E-Kamaal Bhi Kahin Harf-E-Khwaab Main Reh Gaya

ussay kehna


ussay kehna
kabhi milne chala aye
hamarey paon me jo rasta tha
rastey me paid the
paidon me jitni taairon ki tolian
hum se mila karti theen
abb wo urrtey urrtey thak gayi hain
wo ghani shakhain
jo hum pe saya karti theen,murjha gayi hain
ussay kehna kabhi milne chala aye
Labon par lafz hain
Lafzon me koi dastan, qisa, kahani
jo usey aksar sunatey the
kisey ja kr sunain ge
batain ge keh hum
mehrab-e-abroo par sitare tankne wale
dar-e-lab bosa-e-izhar ki dastak pe
aksar kholne wale
kabhi bikhri hui zulfon main hum
mehtab ke gajre bana kar bandhne wale
charagh or aieney k darmean
kab se sar-e-sahil khadey mojon ko takte hain
use kehna use hum yad karte hain
Use kehna hum aa kar khud use milte magar
maqtal badalte mosmon k khoon main rangeen hain
aur hum qatar under qatar
esey boht se mosmon ke darmean tanha khadey hain
jane kabb apna bulawa he
keh hum main aj bhi ik umr ki waraftagi
or wahshaton ka raqs jari he
wo bazi jo bisat-e-jan pe kheli thi
abhi hum ne na jeti he na hari he….!

Mein jo mehka to meri shaakh jala di usne


Mein jo mehka to meri shaakh jala di usne
Sabz mausam mein mujhey sard hawa di usne

Pehley ik lamhey ki zanjeer se baandha mujhko
Aur phir wakt ki raftar bhara di usne

Janta tha ke mujhe mowt sakoon bakhshey gi
Wo sitamgar tha so jeene ki dua di usne

Uske honey se theen sansein meri dugni
‘Sagar’ wo jo bichra to meri umr ghata di usne

mausam aaye hii nahii.n ab ke gulaabo.n vaale


ye jo sar gushta se phirte hain kitabon vaalay
in se mat mil ke inhain rog hain khuwabon vaalay

ab mah-o-saal kii mohalat nahii.n milane vaalii
aa chuke ab to shab-o-roz azaabo.n vaalay

ab to sab dashnaa-o-Khanjar kii zubaa.N bolate hai.n
ab kahaa.N log muhabbat ke nisaabo.n vaalay

jo dilon per hi kabhi naqub zani karte thay
ab gharon tak chalay aaye hain niqabon vaalay

zindaa rahane kii tamannaa ho to ho jaate hai.n
faaKhtaao.n ke bhii kirdaar uqaabo.n vaalay

na mere zaKhm khile hai.n na teraa rang-e-hinaa
ab ke mausam hii nahii.n aaye gulaabo.n vaalay

yun tau lagta hai ke qismat ka sikandar hai faraz
magar andaz hain sab khana kharabon vaalay

Ahmed Faraz.

Unhain zaat kay ista’aron main rakna


Mujhay apnay lafzon ki khusbo’on main rakhna
Mujhay zaat kay ista’aron main rakna
Mujhay apnay aangan main jhuktay huay chand taron main rakhna
Meray chund khut hain jinhain main nay
Apnay lahoo ki sadaqat say likha tha tum ko
Meray chund lamhay hain jin main
Sada’on ki pakeezgi say pukara tha tum ko
Meray chund lehjay hain jin main
Tumhari hi tarz-e-takhatub ka rung aa chala tha
Meray chund jumlay hain jin ki
Sama’at liye ab tumhain ik muddat hui
Meri kuch pasandeedah batain bhi hain
Jin ko hasil tumhari pasandeedgi thi
Meri kuch kitabain hain
Jo tum nay shaid yunhi mang li theen
Mera ik mazi hai
Jis ko tumhari rafaqat nay mazi ka mafhoom bakhsha
Mera ik aaindah tha Jis kay aaina khanon mai
Aks aashna thay tumharay tarasheeda abroo, hijr si jabeen aur khaabon si aankhain
Meri chund khushiyan theen jin pe tumhari
Qamat ka saya-e-afreen tha
Woh aik phool jis ko kabhi tum nay
Saaray phoolon say chun ker rukh liya tha
Unhain aur kuch aur baton ko bhi
Apni yadon main rakhna
Unhain guftogoo kay kinaron main rakhna
Isharon main rakhna
Unhain zaat kay ista’aron main rakna

Muhabbat aik barish hay


Muhabbat Dasht-e-Furqat main

Bina rakht-e-Safer Chaltay

Kisi Majzob Ke dil Se Nikalta aik Noha hay

Muhabbat Raston K Jaal main Bhatkta hua Rahi

Kisi Ke baam per Thehra hua ik Ajnabi Chehra

Muhabbat Khuwab ban jay tu’ tabeerain nahin milteen

Muhabbat aik barish hay

Jo ik bond K tun se mun main Jab uterti hay

Sureelay saaz bajtay hain, anokhay baab khultay hain

Muhabbat Jaltay taptay raston per pheelta saiya

Muhabbat mausamon Ko husan Ka paygham deti hay

Ussey kehna ………!


Ussey kehna ………!
humeiN kab farQ paRta hey
ke…..!
hum tou shaakh sey tooTey huwey pattey
buhat arsaa huwa hum ko
rageiN tak mar chukeeN dil ki
koi paaouN taley rondey
jalaa kar raakh kar daaley
hawaa k haath par rakh kar
kahiN bhi phaink de hum ko
supurd-e-khaak kar daaley
humeiN ab yaad hi kab hey?
k hum bhi eik mosam they
kisi gulshan ki zeenat they
kisi tehni ki qismat they
kai aankhoN ki raahat they
yaa jeewan ki hararat they
buhat arsa huwa wuh khawaab sa mosam
humaarey haath sey phisla
ya shaaid phir khizaaN mosam ko
hum apna samajh baethey
so iss din sey……
kisi mosam sey ab apna
koi rishta nahi banta
kisi ki shaakh ki baanheiN
humeiN pehchaanti kab heiN?
kabhi hum inki dhaRkan they
ye shaakheiN maanti kab heiN?

Woh bhi kaya loog thay


Woh bhi kaya loog thay aasaan thin raahain jin ki
Band aankahin kiye ik simt chalay jaatay thay
Aql-o-dil khawab-o-haqeeqat ki na uljhan na khalish
Mukhtalif jalway nigahoon ko behlatay thay

Ishq saada bhi tha bekhud bhi janoon paisha bhi
Husn ko apni aadaoon pay hijaab aata tha
Phool khiltay thay tou phoolon main nasha hota tha
Raat dhalti thi tou sheeshon pay shabab aata tha

Chandni kaif-e-asar rooh afza hoti thi
Abr aata tha tou badmast bhi ho jatay thay
Din main shorish bhi hua karti thi hangamay bhi
Raat ki goad main moun dhaanp k soo jatay thay

Nurm-ro waqt k dharay pay safeenay thay rawan
Saahil-o-bahar k aaieen na badaltay thay kabhi
Na khudaoon pay bharoosa tha na muqadra pay yakeen
Chaadar-e-aab say toufaan na ubaltay thay kabhi

Hum ko toofan k palaay bhi sataye bhi hain
Barq-o-baraan main woh he shamain jalain kaisay
Ye tou aatish-kaha dunia main bharak utha hai
Aansoon say usay har baar bhujain kaisay

Kar dia barq-o-bakharat nay mahsar barpa
Apnay daftaar main litafat k siwa kuch bhi nahi
Ghir gaye waqt ki be-reham kasha-kash main magar
Pass tehzeeb ki dholat k siwa kuch bhi nahi

Ye andhara ye takatum ye hawaoon ka kharosh
Is main taroon ki subak narm ziyaan kia kartii
Talkhi-e-Zeest say karwa hia Aashiqh ka mizaaj
Nigaah-e-yaar ki masoom aada kia karti

Safar aasan tha manzil bhi bari roshan thiii
Aaj kis darja pur-aasraar hain raahain apni
Kitni parchaiyan aati hain tajal’li ban kar
Kitnay jalwoon say ulajhtii hain nigahain apnii…………….!!

Meray dushmano say kaho koi


Meray dushmano say kaho koi
Kisi gehri chaal kay ehtamaan ka silsila hi fazool hai
Keh shikast yun bhi qabool hai
Kabhi hoslay jo missal thay, woh nahin rahay

Meray harf harf kay jism per
Jo ma’ani kay par-o-baal thay, woh nahin rahay
Kabhi titliyon, kabhi jugnu’on say sajaye phirtay khayal thay
Woh nahin rahay

Meray dushmanon say kaho koi
Woh jo shaam sher-e-wisaal main
Koi roshni si liye huay kisi lub peh jitney sawal thay
Woh nahin rahay

Jo wafa kay baab main wehshaton kay kamal thay, wo nahin rahay
Meray dushmanon say kaho koi
Woh kabhi jo ehd-e-nishat main
Mujhay khud peh itna ghuroor tha, kaheen kho gia
Woh jo fatehana khumar main
Meray saray kha’b nihaal thay
Woh nahin rahay

Kisi dasht-e-lashkar-e-sham main
Meray sur-khuroo mah-o-saal thay, wo nahin rahay
Keh bus ab to dil ki zuban per
Faqat aik qissa-e-haal hai ………
jo Nidhaal hai
Jo gaye dinon ka malaal hai
Meray dushmanon say kaho koi

main tujhe bhool gayee, ye bhi nahin hai, lekin


main tujhe bhool gayee, ye bhi nahin hai, lekin
main tujhe yaad bhi har waqt nahin kar sakti
zindagi kitni hamah-geer hai, kitni purshor
sirf ashkon hi se daaman to nahin bhar sakti

kaisay fitrat ke taqaazon se kinara kar loon
kis tarah talkhi-e-zehraab gawaara kar loon
zindagi kitni hamah-geer hai, kitni purshor

main mohabbat ke taqazay bhi samajhtin hoon magar
main haqiqat ke ishaare bhi to pehchaantin hoon
main teri yaad mein khud apne se ghaafil ho jaaon
masiwa apne kisi aur ko bhi janti hoon

zindagi sirf tarana hi tarana to nahin
kuchh haqiqat bhi hai ye mahaz fasana to nahin
main haqiqat ke ishaare bhi to pahchaanti hoon

sher-o-naghma mein guzarti hui rangin raaten
kaun hoga jinhen naghmaat ka ehsas nahin
talkhi-e-ghum bhi to ik thos haqiqat hai magar
kaun hai jisko haqiqat ka zara paas nahin

yeh dharaktay huay dil aur yeh khanaktay hue saaz
yeh mahaktay huay naghmaat, yeh bajti aawaz
kaun hoga jisay naghmaat ka ehsaas nahin

zindagi kitni hama-geer hai, kitni purshor
aur iss shor mein naghmon ki haqiqat kitni
main tujhe yaad kiye jaaoon yeh mumkin hai magar
iss humah-geeri mein ik yaad ki fursat kitni

kitnay dil-chasp hain, ulfat kay taraanay lekin
kitnay rangeen hai ye saada-se fasaanay lekin

iss hamah-geeri mein in sab ki haqiqat kitni?

jaag sehar aai hey


Raat baaqi thi abhi sar-e-baaleeN aa kar
chaand ney mujh sey kaha –
“jaag sehar aai hey
jaag is shab jo mey-khaab tera hissa thi
jaam ke lab sey tah-e-jaam utar aai hey”

aks-e-jaanaaN ko widaa kar ke utthi meri nazar
shab ke ttherey huwey paani ki siyah chaadar par
ja-bajaa raqs meiN aaney lagey chaandi ke bhaNwar
chaand ke haath sey taaroN ke kaNwal gir gir kar
doobtey, teyrtey, murjhaatey rahey, khiltey rahey
raat aur subh bohat deyr galey miltey rahey

By: Faiz Ahmed Faiz

Kabhi Tum ne yeh bhi Socha


Kabhi Tum ne yeh bhi Socha
Ke Tumharey Dil-garifta
Tumhein KItna Chahtey Hain ?

Tumhein Zindegi se Barh kar
Jo Aziz hum nay Jana
So, Koi Sabab to Ho ga
Kabhi tum ne yeh bhi Socha

Sar-e-Shaam Muntazir they
kahee’n Neelmeen Ujaaley
Kahee’n Titliyaan Laboon ki
Kahee’n Phool Jaise Aariz
Kahee’n Qumqamoon si Aankhein

Yeh Jo Chaara Gar hamarey
Koi Saa’aat-e-Rafaaqat
Sar-e-Shaam Maangtey they
Unhein Kya Khabar k hum nay
Tumhein Soanp di Hain Raatein
Tumhein Daan ki hain Aankhein

Kabhi Tum ne yeh bhi Socha
Ke Tumhaarey Dil-Garifta
Paa-e-Baam-o-Dar Akeley
Kisi Shama Sokhta se
Yeh jo kar rahey hain Baatein
Tumhein Kitna Chahtey Hain ?

Tumhein Roz-o-Shab ke Dukh mein
Kabhi Bhoolna bhi Chahein
To Kabhii na Bhool Paayein
ke Yeh Ehd-e-Zindegi hai
Jisey Torna bhi Chahein
To Kabhi na Tor na Paayein

Samay ke uth’tay mathay per tujhe dhoonda, bahut dhoonda


Woh meri zaat mein jab tak raha likhna nahe bhooli
Koi bhi dard jo mein ne saha likhna nahe bhooli

Woh jo mehvar thaa likhne ka, juda ho kar mila ek din
Mila tu yeh kaha us ne suna likhna nahe bhooli

Suna hai ab bhi chaahat mein tumhara naam ‘Saail’ hai
Suna hai ab bhi tum mujh ko Khuda likhna nahe bhooli

Suna hai ab bhi tum mujh ko mere Saahir bulati ho
Suna hai mujh ko rag rag mein basa likhna nahe bhooli

Kaha ke bhool bethi hoon hatheli per hina likhna
Magar mein aasmanoo per dua likhna nahe bhooli

Samay ke uth’tay mathay per tujhe dhoonda, bahut dhoonda
Samay ke jhuktay shanoo per sada likhna nahe bhooli

Mujhe ek din mere kaatib ne likha thaa juda tujh se
Mein tujh ko aaj bhi khud se juda likhna nahe bhooli

Chupane ke leye sab dukh abhi bhi muskurati hoon
Mein ab bhi chehre per chehre naya likhna nahe bhooli

Mein ab bhi is judai mein kae dukh dard sehti hoon
Mein ab bhi teri aankhoon ko shifa likhna nahe bhooli

Kiya thaa tarq-e-taaluq ka iraada aik pal mein ne
Mein ab bhi us iraaday ko saza likhna nahe bhooli

Batao tum mujhe Janaan! mein kaise bhool sakti hoon
Abhi qudrat mera jeevan numa likhna nahe bhooli

Judaee kaat li mein ne magar marnay se kuch pehle
Mein zindaan ke darechoon per saba likhna nahe bhooli …

Hum say taskheer muqadder kay sitaray na huay


Hum say taskheer muqadder kay sitaray na huay
Zindagi aap thay, aur aap hamary na huay

Phir bata’o keh bhala kis pe sitam dhao gey
Shehr-e-ulfat main ager dard kay maary na huay

Zard aankhon say meri hijr kay moti barsay
Ye bhi kya kam hay muhabat main khasaary na huay

Sach to yeh hay keh bina us kay guzaara jeevan!
Ye bhi sach hay kay bina us kay guzaarey na huay

Iss liye apna milan ho bhi nahi sakta tha
Aik drya kay kabi dono kinaary na huay

Toot jatay hain sabhi pyaar kay rishtay Amjad
Kachay dhagay to kisi kay bhi sahaary na huay

Hijr main khoon rulatay ho, kahan hotay ho?


Hijr main khoon rulatay ho, kahan hotay ho?
Lot ker kyun nahin aatay ho, kahan hotay ho?

Jub bhi milta hia koi shaks baharon jesa
Mujh ko tum kesay bhulatay ho, kahan hotay ho?

Yaad aati hain akailay main tumhari neendain
Kis tarha khud ko sulatay ho, kahan hotay ho?

Mujh say bichray ho to mehboob-e-nazar ho kis kay
Aaj kul kis ko manatay ho, kahan hotay ho?

Shub ki tanhai main aksar yeh khayal aata hai
Apnay dukh kis ko sunatay ho, kahan hotay ho?

Mausam-e-gul main nasha hijr ka barh jata hai
Meray sub hosh churatay ho, kahan hotay ho?

Serd raaton main kesay tumhain bhula sakta hoon?
Aag si dil main lagaty ho, kahan hotay ho?

Tum to khushiyon ki rafaqat kay liye bichray thay
Ab agar ashk bahatay ho, kahan hotay ho?

Sheher kay log bhi ‘Wasiq’ yehi kertay hain sawal
Ab bohot kum nazar aatay ho, kahan hotay ho?

Wo aik pal ko dikhai to day kaheen Mohsin


Talab ko ajar na doon, fikar-e-rahguzar na karoon!
Safar main ab kay hawa ko bhi hamsafar na karoon

Ubhartay doobtay sooraj say torr loon rishta
Main sham orh kay so jaon aur sahar na karoon

Ab is say barh kay bhala kya ho ehtiyat-e-wafa
Main tere sheher say guzroon, tujhe khaber na karoon!

Ye meray dard ki daulat, meri maata-e-firaaq
In ansu’on ki wazahat main umer bher na kroon!

Ujar shab ki khalish ben kay bun main kho jaoon
Main chandni ki terha khud ko derbader na karoon!

Wo aik pal ko dikhai to day kaheen Mohsin
Main jan gunwa k bhi us pal ko mukhtasir na karoon!

 

(Mohsin Naqvi)

Tumhi Dekho Na


Tumhi Dekho Na Yeh Kya Ho Gaya
Tumhara Hoon Main Aur Tum Meri
Main Hairaan Hoon Tumhen Kya Kahu
Ke Din Mein Hui Kaisi Chaandani
Jaagi Jaagi Si Hai Phir Bhi Khwaabon Mein Hai
Khoyi Khoyi Zindagi
Tumhi Dekho Na Yeh Kya Ho Gaya
Tumhara Hoon Main Aur Tum Meri
Behke Behke Se Mann
Mehke Mehke Se Tann
Ujli Ujli Fizzaon Mein Hai
Aaj Ham Hai Jahaan
Kitni Ranginiyan
Chhalki Chhalki Nigaahon Mein Hai
Neeli Neeli Ghataaon Se Hai Chhan Rahi
Halki Halki Roshni
Tumhi Dekho Na Yeh Kya Ho Gaya
Tumhara Hoon Main Aur Tum Meri
Main Hairaan Hoon Tumhen Kya Kahu
Ke Din Mein Hui Kaisi Chaandani
Main Toh Anjaan Thi Yun Bhi Hoga Kabhi
Pyar Barsega Yun Toot Ke
Sach Yeh Ikraar Hai Sach Yahi Pyar Hai
Baaki Bandhan Hai Sab Jhuth Ke
Meri Saanson Mein Hai Ghul Rahi Pyar Ki
Dheemi Dheemi Raagini
Tumhi Dekho Na Yeh Kya Ho Gaya
Tumhara Hoon Main Aur Tum Meri
Main Hairaan Hoon Tumhen Kya Kahu
Ke Din Mein Hui Kaisi Chaandani
Jaagi Jaagi Si Hai Phir Bhi Khwaabon Mein Hai
Khoyi Khoyi Zindagi
Tumhi Dekho Na Yeh Kya Ho Gaya
Tumhara Hoon Main Aur Tum Meri
Yeh Din Mein Hui Kaisi Chaandani

naam adaa likhna


 

pooche jo koi meri nishaani
rang hina likhna
gore badan pe ungli se mera
naam adaa likhna
kabhi kabhi aas paas chand rehta hay
kabhi kabhi aas paas shaam rehti hay
aao naaaaaa aao na
jhelum mein behlenge
waadi ke mausam bhi ek din toh badlenge
kabhi kabhi aas paas chand rehta hain
kabhi kabhi aas paas shaam rehti hain

aao toh subha jaon toh mera naam saba likhna
barf pade toh barf pe mera naam dua likhna
zara zara aag waag pass rehti hay
zara zara kaangdi ki aanch rehti hay
kabhi kabhi aas paas chand rehta hay
kabhi kabhi aas paas shaam rehti hay
(shaamein bujhane aati hain raatein
raatein bujhane tum aa gaye ho)

jab tum haste ho din ho jaata hay
tum gale lago toh din so jaata hay
doli uthane aayega din toh
pass bitha lena
kal jo miley toh
mathe pe mere suraj uga dena
(zara zara aas paas dhup rahegi
zara zara aas paas rang rahenge)

pooche jo koi meri nishaani
rang hina likhna
gore badan pe ungli se mera
naam adaa likhna
kabhi kabhi aas paas chand rehta hay
kabhi kabhi aas paas shaam rehti hay

Hum to wo log haiN jo


Hum to wo log haiN jo
Na kisi k dast-e-shumar maiN haiN
Na kisi ki nigah k hisaar maiN haiN
YouN jaisay koi, sadiyooN ka bay ant safr
Sehra sehra phirta koi khak basr
Kia poochtay ho k kon haiN hum
Jaan lo humaiN to tumhaiN maloom ho
Hum to wo log haiN jo jeevan day ker bhi
Kisi k dil maiN maskan na bana pa’ay
YouN jaisay koi madham si kiran
Kisi rozan say ubhray or doob ja’ay

Usay kehna keh loat aay


Usay kehna kitabooN main rakhay sookhay hoay kuch phool
Us kay loot aanay ka yaqeen ab talak dilatay haiN
Usay kehna kay us ki jheel si aankhaiN kisi manzer pay cha jaiN
To sab manzer younhi phir bheeg jatay haiN
Usay kehna thandi baraf per koi kisi kay sath chalta hai
To qadmooN kay nishan phir say usi kay loot aanay kay nishaN dil per banatay haiN
Usay kehna keh us ki bheegti aankhooN ka wo aansoo
Sitaray ki trha ab bhi humaiN shab bhar jagata hai
Usay kehna keh barish khirkiyooN pay us k aansoo paint kerti hai
Usi ka naam likhti hai
Usay hi gungunati hai
Usay kehna keh khushboo, chandni, taray, saba, rastay, ghata, kajal
Mohobbat, chandni, shabnam, hawa’aiN, raat, din, badal
Sabhi naraz haiN hum say
Usay kehna judai kay darakhtooN per jo sookhi tehniyaaN haiN
Baraf ki chader
Ki zad maiN haiN
Or un shakhooN pay yadooN kay
Jo patay thay sunehri ho gay haiN
Usay kehna december soo gaya hai
Or yakhbasta wo bheegi january phir loat aai hai
Usay kehna keh loat aay

Tumhara mera taluk bas aik lafz ka hai


Tumhara mera taluk bas aik lafz ka hai
Lughat k ant main simta hoa faqt ek lafz
Is aik lafz maiN sachai hai zamanooN ki
Chalo kay aj yahi lafz ikhtayar karaiN
Tamam umer pari hai munafqat k liyay
Is aik lafz ka daman na daghdar karaiN
Alm shumar karaiN, drd aashkar karaiN
Chalo kuch hisab-e-ziyaaN jaaN ker laiN

Yaad Aaya


Bohot dinoon baad
Teray khat k udass lafzoon nay
Teri chahat k zaiqoon ki tamam khushboo
Meri ragoon main undail di hai
Bohot dinoon baad teri batain
teri mulaqat say dehekti ratain
Ujar aankhoon ki piyas patal ki tehoon main
Wasal wadoon ki chand chingariyoon ko sans ki aanch day ker
Teray mehktay maheen lafzoon ki aabsharain
Bohot dinoon baad phir say
Mujh ko rula gai hain
Bohot dinoon baad main nay soocha to yaad aaya
Keh meray ander ki rakh k dhair per abhi tk
Teray zamanay likhay hoay hain
Bohot dinoon baad main nay soocha to yaad aaya
Keh main bhi kitna badal gaya hoon
Bichar k tujh say
Kaye’e lakeeroon main dhal gaya hoon
Main apnay cigarette kay bay irada dhoai’n ki soorat
Hawa main tehleel ho gaya hoon
Na dhoond meri wafa kay naqsh – e – qadam kay raizay
Keh main to teri talash kay bay kinar sehra main
Njanay kis rah main kho gaya hoon

chahat ka ik meetha meetha


Chahat Ka Ik Meetha Dard…(PANKAJ UDHAS) – Sadhna – Pankaj Udhas

 

chahat ka ek metha metha dard jaganay shaam dhalay
teri yadain aa jati haiN mujh ko rulanay shaam dhalay

Teri zulfain in kandhoon per tera chehra hathooN main
Main nay bhi daikhay haiN kitnay khaab suhanay shaam dhalay

teri yadain aa jati haiN mujh ko rulanay shaam dhalay
chahat ka ek metha metha dard jaganay shaam dhalay

Her din hum say wadaa ker k younhi ager tarpaoo gay
Ek din younhi ho jaiN gay hum bhi deewanay shaam dhalay

Teri yadain aa jati haiN mujh ko rulanay shaam dhalay
Chahat ka ek metha metha dard jaganay shaam dhalay

Din k ujaloon main to manaloon laklh jatn say behla looN
lakin dil ka pagal panchi aik na manay shaam dhalay

teri yadain aa jati haiN mujh ko rulanay shaam dhalay
chahat ka ek metha metha dard jaganay shaam dhalay

Abhi Ghar na Jana


 

Abhi Ghar Na Jana Abhi Ghar Na Jana..

Ye Bikhri Si zulfain
Ye Phela Sa Kaajal
Ye Pheeka Sa Gajra
Ye Simta Sa Anchal
Tere Haal Sey Log Pehchan Lenge
Tujhe Dekh Kar Sub Mujhe Jaan Lenge…
Mujhe Jan Lenge……

Abhi Ghar Na Jana Abhi Ghar Na Jana..

Jo Poche Ga Koi Tu Tum Kia Kahogi
Sawalo Ki Bochar Me Chup Rahogi
Pareshan Ghabrai Si Khamushi Me
Jawabo Ki Manzil Bohot Door Hogi
Bozorgo Ki Ankhe Ura Degi Rangat
Saheli K Tane Kaha Tak Sahogi
Na Ban Jai Apna Milan Ek Fasana.

Abhi Ghar Na Jana Abhi Ghar Na Jana..

Ye Behke Qadam Larkharati Jawani
He Betab Dil Or Muhabbat Diwani
Shafaq Jese Galo Pe Aubhri Hovi He
Mere Hontoon Ki Ek Mehekti Nishani
Tere Jism Se Urti Meri Ye Khusho
Suna Degi Har Ek Ko Sari Kahani
Na Banjai Khud Jaal Har Ek Bahana

Abhi Ghar Na Jana Abhi Ghar Na Jana.

Khuda Na Kare Ab Tere Bin Jiyon Me
Ye Dunya Tu Kia He K Jannat Na Loon Me
Tere Ashk Me Apni Ankhoo Me Bharlo
Jo Maut Aay Tu Tere Badle Maroo Me
Ye Jiwan Tu Kia He Jo Mil Jai Mujko
Tu Ye Chand Suraj Bhi Sadke Karo Me
Agar Mar Gai Phir Janam Leke Aana….

Abhi Ghar Na Jana Abhi Ghar Na Jana..
Abhi Ghar Na Jana Abhi Ghar Na Jana.

main Khayaal huuN kisii aur kaa, mujhe sochataa koii aur hai


 

 

main Khayaal huuN kisii aur kaa, mujhe sochataa koii aur hai
sar-e-aaiinaa meraa aks hai, pas-e-aaiinaa koii aur hai

main kisii ke dast-e-talab men huuN, to kisii ke harf-e-duaa men huuN
main nasiib huuN kisii aur kaa, mujhe maaNgataa koii aur hai

kabhii lauT aayeN to na puuchhanaa, sirf dekhanaa baDe Ghaur se
jinhen raaste men Khabar huii ke ye raastaa koii aur hai

ajab aitabaar-be-aaitabaarii ke daramiyaaN hai zindagii
main kariib huuN kisii aur ke, mujhe jaanataa koii aur hai

vahii munsifon kii rivaayaten, vahii faisalon kii ibaaraten
meraa jurm to koii aur thaa, par merii sazaa koii aur hai

terii roshanii merii Khadd-o-Khaal se muKhtalif to nahiin magar
tuu qariib aa tujhe dekh luuN, tuu vahii hai yaa koii aur hai

tujhay kai khabar meray be-khabar mera silsla koi aur hai


tujhay kai khabar meray be-khabar mera silsla koi aur hai
jo mujhi ko muj se baham karay wo garaiz-e-pa koi aur hai

meray moasmoon k bhi toar they meray barg-o-baar he aur they
magar ab ravish hai alag koi magar ab hawa koi aur hai

yehi shehar shehar-e-qarar hai tu dil-e-shikasta ki kher ho
meri aa’s hai kisi aur se mujhay pochta koi aur hai

hain muhabatoon ki aamantain yehi hijratain yehi qurbatain
dee’ay baam-o-dar kis aur ne tu raha basaa koi aur hai

ye fiza k rang khulay khulay isi paish-o-pus k hain silsalay
abhi khush nawa koi aur tha abhi pur kusha koi aur hai

dil-e-zood-o-ranj na kar gila kisi garam -o-sard raqeeb ka
rukh-e-na saza tuu hai roo baroo paas-e-na saza koi aur hai

Sar-e-taq-e-jan Na Chiragh Hai,Pas-e-bam-e-shab Na Sahar Koi,


Sar-e-taq-e-jan Na Chiragh Hai,Pas-e-bam-e-shab Na Sahar Koi,
Ujab Ek Arsa-e-daraz Hai,Na Guman Hai Na Khabar Koi.

Nahin Aab To Koi Malal Bhi,Kisi Wapsi Ka Khiyal Bhi,
Gham-e-baikasi Ne Mita Diya,Meray Dil Main Tha Bhi Aagar Koi.

Tujhay Kia Khabar Ke Raat Bhar,Tujhay Daikh Paanay Ko Ek Nazar,
Raha Sath Chand Kay Muntazar,Teri Khidkion Ke Udhar Koi.

Sar-e-shakh-e-jan Teray Naam Ka,Ujab Ek Taza Gulab Tha,
Jisay Aandhi’on Se Khatar Na Tha,Jisay Tha Khizan Ka Na Daar Koi.

Teri Bairukhi Kay Diyar Main,Ghani Tairgi Ke Hisar Main,
Jalay Kis Tarah Se Chiragh-e-jan,Karay Kis Taraf Ko Safar Koi.

Katay Waqt Chahay Aazab Main,Kisi Khuaab Main, Ya Sarab Main,
Jo Nazar Se Door Nikal Giya,Usay Yaad Karta Hay Har Koi.

Sar-e-bazm Jitnay Chiragh Thay,Woh Tamam Ramz Shanas Thay,
Teri Chashm-e-khush Ke Lihaz Se,Nahin Boolta Tha Magar Koi.

tuhmatein to lagtein hein


tuhmatein to lagtein hein
roshini ki khwahish mein
gher se bahir aaney ki kuch saza to milti hai
log log hotey hein
un ko kia khabr janan’
aap k iradon’ ki khobsorat aankhon mein
basney waley khwabon’ k rang kesey hotey hein
dil ki god aangan mein palney wali baton’ k
zakhm kesey hotey hein
kitney gehrey hotey hein
kab yeh soch saktey hein
esi be-gunah aankhein
gher k koney khudron’ mein chhup k kitna roti hein
phir bhi yeh kahani se
apni kujj byani se
is qadar rawani se dastan’ sunatiin hein
or yaqeen ki aankhon se
sach k ghamzada dil se lag k roney lagti hein

samandar ke kinaray sahilon ki rait ke ander


samandar ke kinaray sahilon ki rait ke ander

hamaray kitne hi anmol khuwabon ke khazeenay hain

dafeenay hain, fasanay hain

hawa chalti hai jab choo kar

hamaray dil ke zakhmon ko

kharabay rooh ke abaad ho jatay hain yadoon se

gaye waqtoon ki baton se

kahan ho tum? kahin bholay se aa niklo

agar aanay pe qadhan hai

tu bus itna hi kar dalo

hawa ke daush pe be harf sargoshi

koi be lafz sandesa hi kar dalo

junon ke wastay itna hi kafi hai

hamain jeena tau hai aur umar baqi hai

wo awazain hi sun lain ge jo koi lab nahin kehtey

aur aisay khuwab bun lain ge, kabhi jo sach nahin hote

bus aisay hi bahanon main ye jeevan paar kar lain ge

tumharay naam kar dain ge !!

aaNkh se aaNkh milaa baat banaataa kyuuN hai – Chitra Singh


 

aaNkh se aaNkh milaa baat banaataa kyuuN hai
tu agar mujhase Khafaa hai to chhupaataa kyuuN hai

Gair lagataa hai na apanon kii tarah milataa hai
tu zamaane kii tarah mujhako sataataa kyuuN hai

vaqt ke saath haalaat badal jaate hain
ye haqiiqat hai magar mujhako sunaataa kyuuN hai

ek muddat se jahaaN kaafile guzare hii nahiin
aisii raahon pe charaaGon ko jalaataa kyuuN hai