Talaash


Raat ke by sakoo’N khamoshi mein

Ro raha hn, keh so nahe  sakta

Raahto’N k mehal banata hy

Dil, jo abaad ho nahe sakta

Door, sham-e-khayal ke maanand

Shama vaadi ke jhilmilati hy

Yaas k be karaa’N andhery mein

Aik umeed…… muskurati hy

Door parbat k pass charwaha

Kho gya gham fiza tarano’N mein

Bain krti hy rooh-e-zakhm aalood

Baansuri ke naheef taano’N mein

Tery jany ka gham bhulata hn

Tery aany ke yaaad aati hy

Haey, is be basi k aalam mein

Kis zamany ke yaad aati hy

Shab ko veeran raah guzaro’N se

Sar jhukaey huay guzarta hn

Qehqaho’N mein qaraar khoya tha

Aansuo’N mein talash krta hn

Saif-ud-Din Saif from Khum-e-Kaakul

bohat dino’N baad


bohat dino’N baad

tery khat k udaas lafzo’N ne

teri chahat k zaiqo’N kee tamam khushboo

meri rago’N mein undail de hy

bohat dino’N baad

teri baatei’N

teri mulaqaat ke dhanak se mehakti raatei’N

ujaarh aankho’N k payas paataal ke taho’N mein

visaal vaado’N kee chand chingario’N ko…….sanso’N ke aanch de kar

shareer sholo’N kee sarkashi k tamam taivar

sikha gae hein

tery mehakty maheen lafzo’N kee aabsharei’N

bohat dino’N baad

phir se mujh ko rula gae hain

bohat dino’N baad

mein ne socha to yaad aya

k mery andar kee raakh k dhyr par abhi tak

tery zamany likhy huay hain

sabhi fasany likhy huay hain

bohat dino’N baad

mein ne socha to yaad aya

k teri yaado’N ke kirchian mujh se kho gae hain

tery badan ke tamam khushboo
bikhar gae hy

bohat dino’N baad

mein ne socha to yaad aya
k, mein bhi kitna badal gya hn
bichar k tujh se
kai lakeero’N mein dhal gya hn
mein apne ciggerate k be irada dhueyn ke surat
hawa mein tehleel ho gya hn
na dhoond meri wafa k naqsh-e-qadam k raizy
k mein to teri talash k be kinaar sehra mein
veham k be amaa’N bagoolo’N k vaar seh kar
udas reh kar
najany kis rah mein kho gya hn
bichar k tujh se teri tarah kya batao’N, mein bhi
na jany, kis kis ka ho gay hn
bohat dino’N baad
mein ne socha………to yaad aya
Mohsin Naqvi from Azab-e-Deed
contribution by (Amaavas)

Khoob nibhay gi hum dono main, mery jaisa too bhi hy


Khoob nibhay gi hum dono main, mery jaisa too bhi hai
Thora jhota main bhi thehra thora jhota too bhi hai

Jang ana ki har hi jana, behter hai ab larny se
Myn bhi hoon toota toota sa, bikhra bikhra too bhi hai

Ek mudat sy fasila qaym sirf hmary beech hi kyun
Sb sy milta rehta hoon myn, sb sy milta too bhi hai

contributed by Amaavas

wo baatain teri, wo fasanay tere


Vo Baten Teri Vo Fasane Tere 
shagufta shagufta bahane tere 

bas ek zakhm nazara hissa mera 
bahaaren teri aashiyane tere 

bas ek daag-e-sajdaa meri qayenat 
jabinen teri aastane tere 

zamir-e-sadaf men kiran ka muqaam 
anokhe anokhe Thikane tere 

faqiron ka jamaghat ghari do ghari 
sharaben teri badakhane tere 

bahaar-o-Khizan kam nigahon ke vaham 
bure yaa bhale sab zamane tere 

“Adam” bhi hai tera hikayat_kadaah 
kahan tak gaye hain fasane tere

meri judaiyon se vo mil kar nahin gaya


meri judaiyon se vo mil kar nahin gaya
usske bagaiir main bhi koi marr nahin gaya

duniya mein ghoom phir ke bhi aise laga mujhe
jaise main apnii zaat se baahar nahin gaya

kya khuub hain hamari taraqqi-pasandiyan
ziine[stairs] banaa liye koi upar nahin gaya

jugraaphiye ne kaat diye raaste mere
taarikh ko gila hai ke main ghar nahin gaya

aisi koi ajeeb imaarat thi zindagi
baahar se jhaankta raha andar nahin gaya

sab apne hi badan pe ‘muzaffar’ saja liye
vapas kisi taraf koi patthar nahin gaya

sukoon e dil ke liye kuch to ehtimaam karoon


sukoon e dil ke liye kuch to ehtimaam karoon

zara nazar to mile phir unhain salaam karoon

 

mujhe to hosh nahin aap mashwara deeje

kahan se cherron fasana, kahan tamaam karoon

 

uhni ke zulam ka shikwa karoon zamane se

unhi ke haq main duaein main subah shaam karoon

 

woh bewafa hain to ham ne ‘Shakeel’ soch liya

mujhe kasam hai kisi se agar kalaam karoon

Haath Ankhon pe rakh lene se


haath aaNkhoN pe rakh lene se Khatraa nahiiN jaataa
diivaar se bhuuchaal ko rokaa nahiiN jaataa

daavoN kii taraazuu meN to azmat nahiiN tultii
fiite se to qirdaar ko naaNpaa nahiiN jaataa

(qirdaar : character; fiite : measuring string)

farmaan se peRoN pe kabhii phal nahiiN lagte
talvaar se mausam ko’ii badlaa nahiiN jaataa

(farmaan : edict)

chor apne gharoN meN to nahiiN naqb lagaate
apnii hii kamaa’ii ko to luuTaa nahiiN jaataa

auroN ke Khayaalaat kii lete haiN talaashii
aur apne gariibaan meN jhaaNkaa nahiiN jaataa

faulaad se faulaad to kaT saktaa hai lekin
kaanuun se kaanuun ko badlaa nahiiN jaataa

zulmat ko ghaTaa kahne se baarish nahiiN hotii
sholoN ko havaaoN se to DhaaNpaa nahiiN jaataa

tuufaan meN ho naav to kuch sabr bhii aa jaaye
saahil pe khaRe ho ke to Duubaa nahiiN jaataa

daryaa ke kinaare to pahunch jaate haiN pyaase
pyaasoN ke gharoN tak to ko’ii daryaa nahiiN jaataa

Allah jise chaahe use miltii hai “Muzaffar”
izzat ko dukaanoN se khariidaa nahiiN jaataa

Muzaffar Warsi