lout aana…


udaas shamon ki siskion mai..

kabi jo meri awaz sun’na,
to beetay lamhon ko yaad kar k,
inhi fizaon mai lout aana..

tm aya karte thay khawab ban kar,
kabi mehkta gulaab ban kar,
mai khushak honton se jab pukaron,
in adaon mai lout aana…

meri wafaon ka pas rakhna,
meri duaon ka pas rakhna,
mai khali hathon ko jab uthaon,

meri du’aon mai lout aana..
ho sakay to lout aana…

Kal aur aaj


Vo bhii kya log thay aasaan thii raahain jin kii
band aankhain kiyay ik simt chalay jaatay thay
aql-o-dil khvaab-o-haqiiqat ki na uljhan na khalish
mukhtalif jalvay nigaahon ko na behlaatay thay

Ishq saadaa bhii thaa, baykhud bhii, junuun-paishaa bhii
husn ko apnii adaaon pay hijaab aataa thaa
phuul khiltay thay to phuulon main nashaa hotaa thaa
raat dhalti thii to shiishon pay shabaab aataa thaa

Chaandnii kaif-asar ruuh-afzaa hotii thii
abr aataa thaa to badmast bhii ho jaatay thay
din main shorish bhii huaa kartii thii, hangaamay bhii
raat kii god main muunh dhaanp kay so jaatay thay

Narm rau vaqt kay dhaaray pay safiinay thay ravaan
saahil-o-bahr kay aaeeN na badaltay thay kabhii
naakhudaaon pay bharosaa thaa muqaddar pay yaqiin
chaadar-e-aab say tuufaan na ubaltay thay kabhii

Ham kay tuufaanon kay paalay bhii sataaey bhii hain
barq-o-baaraan main vo hii shamain jalaayain kaisay
yeh jo aatish-kadaa duniyaa main bharrak utthaa hai
aansuuon say usay har baar bujhaayain kaisay

Kar diyaa barq-o-bukhaaraat nay mahshar barpaa
apnay daftar main lataafat kay sivaa kuchh bhii nahin
ghir gaey vaqt ki bay-raham kashaakash main magar
paas tahziib kii daulat kay sivaa kuchh bhii nahin

Ye andhairaa yeh talaatam yeh havaaon kaa kharosh
is main taaron kii subak narm ziyaa kyaa kartii
talkhii-e-ziist say karrvaa huaa aashiq kaa mizaaj
nigaah-e-yaar ki maasuum adaa kyaa kartii

Safar aasaan thaa to manzil bhii barii raushan thii
aaj kis darjaa pur-asraar hain raahain apnii
kitnii parchhaiyyaan aatii hain tajallii ban kar
kitnay jalvon say ulajhtii hain nigaahain apnii

“Aal Ahmed Saroor”

Naakaami


Mai nay her-chand ghum-e-ishq ko khona chaha
ghum-e-ulfat ghum-e-dunya mai samona chaha

wohi afsaanay meri simt rawaa(n) hain ab tak
wohi sholay mairay seenay mai nihaa(n) hain ab tak
wohi bay-sood khalish hay mairay seenay mai hanooz
wohi bay-kaar tamannaein jawaa(n) hain ab tak
wohi gaisu mairi raato(n) pai hain bikhray bikhray
wohi aankhain meri janib nigraa(n) hain ab tak
kasrat-e-ghum bhi mairay ghum ka madawa na huwi
mairay bay-chain khayalon ko sakoo(n) mil na saka
dil nay dunya kay her dard ko apna to liya
muzmahill ruh ko andaz-e-junoo(n) mil na saka
mairay takhaiyyul ka sheraaza berhum hay wohi
mairay bujhtay huway ehsaas ka aalim hay wohi
wohi bay-jaan iraday, wohi bay-rang sawal
wohi bay-rooh kashakash, wohi bay-chain khayal
Aah iss kashmakish-e-subah-o-masa kaa anjaam
mai bhi nakaam, meri sai-e-amal bhi nakaam

yay zindagee kabhi kabhi ajnabi c lagti hai


yay zindagee kabhi kabhi ajnabi c lagti hai
jidhar jidhar nazar uthay kuch kami c lagti hai
bujhi bujhi hai kehkashaan
dhuan dhuan lagay jahaan
hawa-ain bhi agar choo-ain
jala-ain hum ko khushboo-ain
chiraagh ki bhi roshni saanvli see lagtee hai

laho laho hai aarzoo
ghubaar saa hai chahar soo
kabhi gumaan,kabhi yaqeen
qadam kahin, nazar kahin
jo hosh main bhi rahain
tu bai-khudee see lagti hai

khayal main bhi ho sanam
tu bhool ja-ain khud ko hum
jo dard-ae dil chamak uthay
ro-aan roo-aan bhaRak uthay
ho aankh tar tu kis qadar tishnagi c lagti hai
ye zindagi kabhi kabhi ajnabi c lagti hai

Qateel shifaee

keoN zoaQ-e-sheR day k tamaasha kia mujhaY


goonghaY labooN se harf-e-tamana kia mujhaY
kis koaR chashm shab maiN sitaRa kia mujhaY

jab haRaf-e-nashanas yahaN lufz fahim haiN
keoN zoaQ-e-sheR day k tamaasha kia mujhaY

khushbO hai chandni ha lub-e-joo hai auR maiN
kis be-panaha raat maiN tanhaa kia mujhaY

de tashnaghi khuda ne tu chashmaY be day deaY
seenaY maiN dasht ankhoON maiN darya kia mujhaY

maiN yuuN sambhal gaye k teri be-wafie ne
be-aitbarioN se shanasa kia mujhaY

wo apNi aik zaat maiN kul kayanat tha
dunia k haaR faraib se milwa dya mujhaY

beetaY dinO ka akas na aienda ka khayal
bus khali khali ankhooN se dekha kia mujhaY

Shehar-e-Dil Ki Galiyoon main………!!


Shehr-e-Dil ki Galiyoon main
Shaam se bhataktay hain
Chand k Taman-na-ee
Baiqarar Saudaii
Dil Gudaz Tarikii
Jan Gudaz Tanhai
Rooh-o-Jaan ko Dasti haii
Rooh-o-Jaan main Basti hai
Shehr-e-Dil ki Galiyoon maain

Taak-e-Shab ki bailoon per
Shabnami Sarshakoon ki
Beqarar Logon nay
Beshumaar Logon nay
yadgaar chorhi hay
Itni Baat Thori Hai ?

Sud-Hazar batain thin
Hela-e-Shakebaee
Soraton ki Zebai
Qamaton ki ranaii
In siah raton main
Aik bhi na yaad aae
Ja bja bhataktay hain
Kis ki rah taktay hain
Chand kay taman’naee

Ye Nagar Kabhi Pehlay
Is Qadar Na Veeran Tha
Kehnay walay kahte hain
Qarya-e-Nigaraan Tha
Khai apnay Jeenay Ka
Yeh bhi aik samaan tha

Aaj Dil main Veerani
Abr ban kay Ghiraaii
Aaj Dil ko kya Kahiyea
Ba-Wafa Na Haarjae
Phir Bhi Log Diwanay
Aa gayay hain samjhanay
Apni wehshat-e-dil k
Bun liyay hain afsanay
Khush khayal dunya nay

Garmiaan to Jaati hain
Woh rutaain bhi aati hain
Jab Maluul raton may
Doston ki baton may
Ji na chain payay ga
Aur oob jayay ga
Aahaton say Gonjain gi
Shehar-e-Dil ki Pinhaee
Aur chand raton main
Chandni kay Shedaii
Har bahanay niklain gay
Aarzoo ki Gairaii
Dhondnay ko Ruswaii
Sard Sard Raton ko
Zard Chand Bakhshay ga
Bay-Hisaab Tanhaii
Bay-Hijaab Tanhaii
Shehar-e-Dil Ki Galiyoon main………!!

Mohabbat ki aseeri se rehayi mangtay rehna


Mohabbat ki aseeri se rehayi mangtay rehna
Buhut asaan nahiin hota judai mangtay rehna

Zara sa ishq kar lena zara si aankh bhar lena
Phir us kay baab main saari khudai maangtay rehna

Kabhi mehroom honton per dua ka hurf rakh dena
Kabhi wehshat main uski narsai mangtay rehna

Wafaon kay tasalsal se mohabbat ruth jaati hai
Kahaani main zara si bewafai mangtay rehna

Ajab hai wehshat-e-jaan bhi kay adat ho gayi dil ki
Sukoot-e-sham-e-ghum se hum navai mangtay rehna

Kabhi bachay ka nanhe haath per titli kay per rakhna
Kabhi phir us kay rangon say rehai mangtay rehna

(Noshi Gillani)

Wo khayal tha koi dhanak-numa ya koi aks tha merey ru’baru


Wo khayal tha koi dhanak-numa ya koi aks tha merey ru’baru
jo mujhey har taraf sey tu laga wo tu hi tha ya koi hu-bahu!

bayaaN meiN thi wo chaashni ke mehak raha tha harf harf
jesey khushbuoN ki zubaan meiN koi kar raha ho guftagu

nahi kuch khabar ke kis gharri terey raastoN ka sira miley
terey naqsh-e-pa ki talaash meiN lagi to hey meri justuju

bas deikhna hey kis tarhaN wo ji raha hey merey baghair
yuN to dil meiN hey wo aaj bhi jisey dhooNdta hooN ku-ba-ku

ye yaad tha ke duwa karooN par utthey rahey merey haath yuN
jesey khaahishoN ke hajoom meiN kaheeN kho gai teri aarzu

By: Amal

Ay meri be’suhaag tanhaai!


Is se pehlay ke suraj ka kundan
Shaam-e-gham ke ujaar sehra mein
Jal bujhay, bujh ke raakh ho jaaye
Is se pehlay ke chahatoon ka yaqeen
Waahmon ke bhanwar mein kho jaaye

Iss se pehlay ke chaand ka jhoomar!
Dard ki jheel mein utar jaaye
Aur khwahish ki chandni ka ghubaar
Waqt ki aankh mein bikhar jaaye

Is se pehlay ke apne dil ki rugain
Ik ik ker ke toot’ti jayein
Aur tanaabein gulaab khwaabon ki
Apne haathon se chhoot’ti jayein

Is se pehlay ke ghair le mujh ko
Her taraf se jaloos-e-ruswaai
Qurbatoon ke nishaan mita dale
Hijr ke zalzaloon ki angraai

Ay meri be’suhaag tanhaai
Mujh se pursa le apne pyaaron ka
Bujhtay ashkon ke un sitaaron ka
Jo her ik ajnabi ke rastay mein
Noor ki chaadrein bichhaatay thay
Jo kisi subh’zaad ki dhun mein
Raat bhar roshni lutaatay thay

Ay meri be’suhaag tanhaai!
Aa mere paas, mujh se pursa le
Un gulaabon ka un suhaabon ka
Habs ki rut mein jo barastay thay
Jin ke pal bhar ke lams ki khatir
Mausamon ke badan tarastay thay

Ay meri be’suhaag tanhaai!
Is se pehlay ke saans thak jaaye
Shoq doonday nai guzargaahein
Is se pehlay ke be’nishaan thehray
Hasrat-e qurb ki sabhi raahein
Meri gardan mein daal de baanhein!!!!

Juz mere kon tuj ko chahay ga
Mein bhi teri tarah akela hoon
Aankh mein tishnagi ka sehra hai
Dil mein paataal ki si gehraai
Aur kia ho reh-e-shanaasaai

Ay meri be’suhaag tanhaai!

Tazeer-e-ehtimaam-e-chaman kaun day gaya


Tazeer-e-ehtimaam-e-chaman kaun day gaya
Mujh ko gulaab jaisa kafan kaun day gaya

Daikhay jo khad-o-khaal toh socha hai baareha
Sehra ki chaandini ko badan kaun day gaya

Meri jabeen ki saari lakeerain teri atta
Lekin teri qaba ko shikan kaun day gaya

Teray hunar mai khulqat-e-khushboo sahi magar
Kaanton ko umer bhar ki chubhan kaun day gaya

Jungle say poochti hain hawaaon ki barhami
Jugnoo ki tairgi mai kiran kaun day gaya

Kis nay basaaye aankh mai ashkon kay qaaflay
Be-ghar musaafiron ko watan kaun day gaya

Tujh say toh khair pall ki musaafit ka saath tha
Meray badan ko itni thakan kaun day gaya

Todha hai kis nay nok-e-sinaan par sakoot-e-sabr
Lab bastagi ko taab-e-sukhan kaun day gaya

*Mohsin* wo kaayinaat-e-ghazal hai ussay bhi daikh
Mujh say na pooch mujh ko yeh funn kaun day gaya

 

(Mohsin Naqvi)

acha lagta hai wo magar kitna


bhool jata hoon milney walon ko
khud se phirta hoon bekhabar kitna

usne aabaad ki hai tanhai
warna sunsaan tha ye ghar kitna

kaun ab arzoo kare uski
ab dua main bhi hai asar kitna

wo mujhay yaad kar ke sota hai
us ko lagta hai khud se dar kitna

aadatain sub buri hain Mohsin k
acha lagta hai wo magar kitna 

Main tumharay aks ki aarzoo mein bass aayina hi bani rahi


Main tumharay aks ki aarzoo mein bass aayina hi bani rahi
Kabhi tum na samnay aa sakay, kabhi mujh pay gard pari rahi

Woh ajeeb shaam thi,aaj tak meray dil mein uss ka malal hai
Meri tarah jo teri muntazir, teray rastay mein khari rahi

Kabhi waqf-e-hijr main ho gaei,kabhi khwab-e-wasl mein kho gaei
Main faqeer-e-ishq bani rahi, main aseer-e-yaad huwi rahi

Bari khamshi say sarak kay phir meray dil kay gird lipat gaei
Woh rida-e-abr-e-sfed jo sar-e-kohsar tani rahi

Huwi uss say jabb meri baat bhi,thi shareek-e-dard woh zaat bhi
To na janay kon si cheez ki meri zindgi mein kami rahi

wo dil hi kaya teray milnay ki jo dua na karay


 

 

wo dil hi kaya teray milnay ki jo dua na karay
main tujh ko bhool zinda rahoon khuda na karay

pukara tu ne jo halaat ke andheron se
milay gi meri wafa tujh ko roshni ban kar
main jis maqam se guzron gi le ke naam tera
rahe ga saath tera payar zindagi ban kar
ye aur baat meri zindagi wafa na karey

issi tarah se he wo log bhi to zinda hain
jinhon ne umr guzari hai bewafai main
taraptay hijr ki raatain guzar hi jatin hain
ye theek hai nahin marta koi judai main
khuda kisi ko kisi se magar juda na karay

wo dil hi kaya teray milnay ki jo dua na karay
main tujh ko bhool zinda rahoon khuda na karay

tum meray saath ho, humraah nahi


http://wheresmymp3.com/node/426

Lafz-e-pas-e-lafz
jo ham boltay hain, roltay hain
kon sa lafz hai kholay ga jo dar ma’ni ka
iss ka patta kon karay
tum to khushbu ho, sitaaroN ki guzargaah ho tum
tum kahan aao gai iss dasht-e-purasrar ki pehnai main
kaise utro gai tamannaoN ki gehrai mai

reh gaya maiN
so aye jaan-e-wafa
mai to jo kuch hoon tumharay hi kham-e-chashm se hoon
tum hi jab lafz pas-e-lafz se aagah nahi
kis tarah sehr-e-mafaheem ko darwaza khulay
lafz ki kokh main taseer kahan se utray

tum meray saath ho, humraah nahi
kon se khuwaab ke jugmug main nihaaN hain ham tum
kaise girdaab-e-tamanna mai rawaaN hain ham tum
lafz ka paar jo daikhain to koi raah nahi
aur tum lafz-e-pas-e-lafz se aagaah nahi


(AIA)

Tayray Naam Ki Thee Jo Roshnee


Tayray Naam Ki Thee Jo Roshnee
Ussay Khud Hee Tou Nay Bujhaa Diyaa
Na Jalaa Saki Jissay Dhoop Bhi
Ussay Chandni Nay Jala Diya
Main Hoon Gardishoo’n Main Ghiraa Hovaa
Mujhay Apnay Aap Ki Khabar Nahee’n
Woh Jo Shakhs Tha Mayraa Rehnumaa
Ussay Raastoo’n Main Ganwaa Diyaa
Jo Tayree Nazar Main Ajeeb Tha
Wohee Shakhs Tayraa Habib Tha
Tayray Haath Ki Woh Lakeer Thaa
Ussay Haath Say Hee Mitta Diyaa
Mujhay Ishq Hay Keh Junoo’n Hay
Abhi Faislaa Nahee’n Ho Sakaa
Mayraa Naam Zeenat-e-Dasht Thaa
Mujhay Aandhiyoo’n Nay Mitta Diyaa

meray sahir se keh dena


meray sahir se keh dena
musafir aaj tak chup hai
k Uss k haath meiN tum ne
jo apna haath rakha tha
vo ab tak yaad karta hai

mery sahir se keh dena
k sadioN ki musafat ne
mery pairooN se baandhi hai
thakaN ab k baras itni

k apni doobti nabzooN se maiN khayef sa rehta hooN
na janay kab kahaN pe umer ki ye dor kat Jaa’ey

mery sahir se keh dena
k Uss k ishq k tilsam se ab tak vo nahi niklay
k jin ko uss ki aankhon ne faqat Ik baar dekha tha

mery sahir se keh dena
k saray shehar ko mery
yunhi patthar na rehnay dey
mery tilsam kadoN meiN laut kar aa’ey
k Vo Patthar Tarastay Hain
Tumhari Chashm Ki Jumbish Unhein Ik Bar Phir Kar De
Kisi Zee Rooh Ki Manind

Mery Sahir Se Keh Dena
Bichad Kar Tum Jo Miltay Thy
To Yun Mehsoos Hota Tha
k Jaisay Marg k Dhundley Kinaroon Tak Pahunchaty Hi
Adhoora Kaam Koi Zindagi Ko Yaad Aa Jaye
Kaho Phir Se Chala Aaye
k Uss k Laut Aany Se
Hamari Doobti Nabzoo Ko Phir Se Saans Aa Jaye
Agar Sehra Se Guzro To
Mery sahir Se Keh Dena

Agar Jungle Se Guzro To
Mery Jugnoo Se Keh Dena
Tumhari Be Sabab Doori
Mujhay Aksar Rulati Hay
Meri Shaamein Andheri Hain
Meri Raatein b Teera Hain
Mery Sab Taaq Khali Hain
Meri Aankhein Sawali Hain

Khawab dar khawab teray gham ko paroya kaisa


Dil munafiq tha shab-e-hijar main soya kaisa
Aur jab tuj say mila toot kay roya kaisa

Zindagi maiN bhi ghazal hi ka kareena rakha
Khawab dar khawab teray gham ko paroya kaisa

Ab toH chehrun pay bhi katbuo’n ka ghuman hota hai
AankhaiN pathraey hoi haiN lab-e-goya kaisa

Dekh ab qurb ka mousam bhi na sar sabz lagay
Hijar hi hijar marasim main samoya kaisa

Aik aansoo tha kay dariya-e-nidamat tha FARAZ
Dil say baibaak shanawar ko daboya kaisa

Is shehar k logon nay…………..!!!


Aadat he bana li hai
Is shehar k logon nay
Andaz badal laina
Awaz badal liana
Dunia ki mohabbat main
Atwaar badal liana
Mousam jo naya aaye
Raftaar badal laina
Aghyaar wohi rakhna,
Ehbaab badal liana
Aadat he bana li hai
Is shehar k logon nay
Rastay main agar milna
Nazroon ko jhuka laina
Awaz agar do tou
Katra k guzar jana
Har aik say juda rehna,
Har aik say khafa rehna
Har aik ka gila karna
Jaatay hue raahi ko
Manzil ka pata day kar
Rastay main rula daina.
Aadat he bana li hai
Is shehar k logon nay…………..!!!

Aap Ko Dekh Kar Dekhtaa Rah Gayaa


 

Aap Ko Dekh Kar Dekhtaa Rah Gayaa
Kya Kahun Aur Kehne Ko Kyaa Rah Gayaa

aatay aatay mera naam sa reh gaya
us ke honton pe kuch kanpta reh gaya

Wo mere samnay hi gaya aur main
rastay ki tarah dekhta reh gaya

jhoot walay kahin se kahin barh gaye
aur main tha ke sach bolta reh gaya

<——————>

Un Kii Aankhon Men Kaise Chhalakane Lagaa
Mere Honthon Pe Jo Maajaraa Rah Gayaa

Aise Bichhade Sabhii Raah Ke Mod Par
Aakharii Ham_safar Raastaa Rah Gayaa

Soch Kar Aao Kuu-E-Tamannaa Hai Yeh
Jaaneman Jo Yahaan Rah Gayaa Rah Gayaa

Hazoor aap ka bhi


 

Huzoor Aap ka bhi aihteRaam karta chalooN
Edhar se ghuzra tha sooch salam karta chalooN

Nigah o Dil ki yahi akheri tamanna hay
Tumhari Zulf kay sa’ay main shaam karta chalooN

Un’hain yeh zid, keh mujhay daikh kar kisi ko na daikh
Mera yeh shooq keh sub say kalaam karta chalooN

Yeh meray khwabooN ki Duniya nahein sahi laykin
Ab aaga’ya hoon to dau din qayaam karta chalooN

Shadab Lahori

 

Badal lo raasta apna


Bazahir aam lehjay main
Kaha tha main nay jab us se
“Badal lo raasta apna
Juda rahain yaheen karlo
Hamaray chahnay na chahnay se
Kuch nahi hota
Yehi sach hai keh hum do mukhtalif
Raston kay raahi hai
To phir kyon dil ki manain hum
Shuru main manti hoon main
Aziyyat dil ko pohanchay gi
Magar phir waqt guzray ga
Sabhi zakhmon ko bhar de ga”
Meray is aam say lehjay pay wo
Ik pal ko chonka tha
Meri aankhon main aankhain daal kar
Hairat se poocha tha
“Yeh sab jo keh rahi ho khud ko yeh samjha bhi pao gi?”
Bohat hi jee kara kar ke
Main us dam muskuraii thi
Bohat khud pay jabr kar ke
Main us say keh yeh payi thi
“Meri tum fikr rehnay do
Sambhal jaoon gi main khud hi
Sabhi zakhmon ko sii loon gi
Bhula kar sari batoon ko
Akaili bhi main jee loon gi”
Buhat hi be yaqeen aakhoon se
Us ne mujh ko dekha aur
Bina ik lafz bolay wo gaya or phir nahi aaya
Aur ab tark-e-taalluq ko
Agarcheh umar beeti hai
Magar is dil pe us ki zaat ka
Jo naqsh qaaim tha
Kabhi dhundla nahi hota
Mujhay mehsoos hota hai
Ke jaisay meray kanoon main
Wo apni bolti aankhoon se
Sargoshi si karta hai
“WO SAB JO KEH RAHI THEEN
KHUD KO WO SAMJHA BHI PAI HO?”

Kabhi yuN jo ho kisi din agar


Kabhi yuN jo ho kisi din agar
Kabhi tu mujhey sare-e-raah miley
meiN hazaar lamhon ko kheench kar
Ye jo chalta waqt hey baandh duN

Ye jo gardishen hein zameen ki
Usi ik lamhey pe ruki rahaiN

Mein taka karuN tujhey jazb sey
Yunhi piyaar sey yuNhi ishQ sey
Teri har adaa ko sameiT luuN
Mein hisaar-e-jaaN meiN sajaa rakhuN
Na to keh sakey , na mein keh sakuN
Tu jo paas ho to mein jee sakuN
Tu jo door ho na jia karoon

Kabhi yuN jo ho kisi din agar
Merey humsafar tu jo na miley
Mein hazaar dharkanon ko kheench kar
Ye jo chalta dil hey baandh duN

Ye jo silsiley hein meri saans key
Teri doori mein hi haar duN
Tu jo paas ho to mein jee sakuN
Tu jo door ho , na jiya karuN

Kabhi yuN jo ho kisi din agar
Merey hum safar tu jo na miley…!

aaGhaaz to hotaa hai anjaam nahiiN hotaa


 

aaGhaaz to hotaa hai anjaam nahiiN hotaa
jab merii kahaanii meN vo naam nahiiN hotaa

jab zulf kii kaalikh meN ghul jaaye ko’ii raahii
bad-naam sahii lekin gum-naam nahiiN hotaa

haNs haNs ke javaaN dil ke ham kyouN na chune TukRe
har shaKhs kii qismat meN ina’am nahiiN hotaa

bahte hu’e aaNsuu ne aaNkhoN se kahaa tham kar
jo mae se pighal jaaye vo jaam nahiiN hotaa

din Duube haiN yaa Duubii baaraat liye kashtii
saahil pe magar ko’ii kohraam nahiiN hotaa

ek intizaar-e-mujassam ka naam – Khamoshii


 

 

ye nuur kaisaa hai
raaKh kaa saa rang pahne
barf kii laash hai
laave kaa saa badan pahne
guuNgii chaahat hai
rusvaa’ii kaa kafan pahne
har ek qatraa muqaddas hai maile aaNsuu kaa
ek hujuum-e-apaahij hai aab-e-kausar par
ye kaisaa shor hai jo be-aavaaz phailaa hai
rupahlii chaaNv meN – badnaamioN kaa Deraa hai
ye kaisii jannat hai jo chaunk-chaunk jaatii hai
ek intizaar-e-mujassam ka naam – Khamoshii
aur ehsaas-e-bekaraaN pe ye sarhad kaisii?
dar-o-diivaar kahaaN ruuh kii aavaargii ke
nuur kii vaadii talak lams kaa ek safar-e-taviil
har ek moR pe bas do hii naam milte haiN
maut kah lo – jo muhabbat nahiiN kahne paa’o

aablaapaa ko’ii is dasht meN aayaa hogaa


 

aablaapaa ko’ii is dasht meN aayaa hogaa
varnaa aaNdhii meN diyaa kis ne jalaayaa hogaa

zarre zarre pe jaRe hoNge kuNvaare sajde
ek ek but ko Khudaa us ne banaayaa hogaa

pyaas jalte hu’e kaaNToN kii bujhaa’ii hogii
riste paanii ko hathelii pe sajaayaa hogaa

mil gayaa hogaa agar ko’ii suneharii patthar
apnaa TuuTaa hu’aa dil yaad to aayaa hogaa

(Meena Kumari)

chaaNd tanhaa hai aasmaaN tanhaa


 

 

chaaNd tanhaa hai aasmaaN tanhaa
dil milaa hai kahaaN kahaaN tanhaa

bujh gaii aas chhup gayaa taaraa
thar-tharaataa rahaa dhuaaN tanhaa

zindagii kyaa isii ko kahte haiN
jism tanhaa hai aur jaaN tanhaa

ham-safar ko’ii gar mile bhi kahiiN
donoN chalte rahe tanhaa tanhaa

jaltii bujhtii si raushnii ke pare
simTaa simTaa sa ek makaaN tanhaa

raaH dekhaa karegaa sadiyoN tak
chhoR jaayeNge ye jahaaN tanhaa

(meena kumari)

puuchhte ho to suno kaise basar hotii hai


 

puuchhte ho to suno kaise basar hotii hai
raat Khairaat kii sadqe kii sahar hotii hai

saaNs bhrane ko to jiinaa nahiiN kahte yaa rab
dil hii dukhtaa hai na ab aastiiN tar hotii hai

jaise jaagii hu’ii aaNkhoN meN chubheN kaaNch ke Khvaab
raat is tarah diivaanoN kii basar hotii hai

Gham hii dushman hai meraa Gham hii ko dil DhuuNDhataa hai
ek lamhe kii judaa’ii bhii agar hotii hai

ek markaz kii talaash ek bhaTakatii Khushbuu
kabhii manzil kabhii tamhiid-e-safar hotii hai

bohat m’asoom thay hum bhi!


bohat m’asoom thay hum bhi!
humaiN ab yad aata hai
bohat m’asoom thay hum bhi
k hum ik ajnabi ko umr ki tareek rahoN maiN
sahara maan baithay thay
k uske chand chehray ko
hum apne bakht ka roshan sitara maan baithay thay
humaiN m’aloom hi kab tha
k dasht-e-zindagaani maiN saharay choot jatay haiN
kabhi aisa bhi hota hai
nazar jin par Theharti hai
woh taaray tooT jatay haiN…!
bohat m’asoom thay hum bhi..!!

By Mehroo

Hazar dost meray, wajah-e-malal poochain gay


Hazar dost meray, wajah-e-malal poochain gay
Sabab to sirf tumhi ho, main kya kahoon ga tumhain

Meri pasand, meray naam per na harf aaye
Bohot haseen, bohot bay wafa kahoon ga tumhain

Abhi say zehen main rakhna nazaakatain meri
Keh her nigah-e-karam per khafa kahoon ga tumhain

Qasam sharafat-e-fun ki keh ab ghazal main kabhi
Tumhara naam na loon ga, Saba kahoon ga tumhain

na hi manzil mili , na koi aashna,


na hi manzil mili , na koi aashna, main bhatakti rahi, safr jaari raha
umar-e-chand roz ka lamha lahma yahan main ne tanha saha garchay bhari raha

yeh muqaddar ke madd-o-jazar kiya kahoon? ke main shahsdar rahi, kuch bhi keh na saki
woh mujhe daikh kar ajnabi ban gaya jo merey rastoN ka pujari raha

mujh say pucho nahin tum Khuda ke liye, main nahin janti muskurahat hai kia
ke main jabtak rahi to mere dais main aalam-e-wehshat-o-sog taari raha

na koi aarzoo hai na shikwa gila, yeh bhi acha huwa mera dil bujh gaya
warna jab tak raha yeh mere wastay mustaqil wajha-e-bayqaraari raha

aisa kiyoonkar huwa…sochti hi rahi, main dukhon ke qafas main umar bhar rahi
main kisay dosh doon ke meri raah main…mera apna muqaddar shikaari raha

woh mila to bhi ankhon ko aansoo milay, na mila to bhi hontoN pe aahain raheeN
woh ajab shakhs tha ke har ik haal main…wajha-e-bay sabab sogwaari raha

By mehroo

sundar komal sapno.n kii baaraat guzar ga’ii jaanaa.n


sundar komal sapno.n kii baaraat guzar ga’ii jaanaa.n
dhuup aa.nkho.n tak aa puh.nchii hai raat guzar ga’ii jaanaa.n

bhor samay tak jis ne hame.n, baaham uljhaa’ye rakhaa
vo albelii, resham jaisii baat guzar ga’ii jaanaa.n

kis ko.npal kii aas me.n ab tak, vaise hii sar-sabz ho tum
ab to dhuup kaa, mausam hai, barasaat guzar ga’ii jaanaa.n

sadaa kii dekhii raat hame.n, is baar milii to, chupkay se
Khaalii haath pe, rakh ke kayaa, sauGhaat guzar ga’ii jaanaa.n

Main Bhula Chuka Sabhi Waastey


Main Bhula Chuka Sabhi Waastey Jo Thay Manzilon Ke Hasool Mein
Mairi Manzilon Ke Hasool Mein Teri Raah Aaye To Kya Karoon

Jo Pukaarta Tha Her Aik Gharri Jo Jurra Tha Dil Say Larri Larri
Koi Shaks Aisa Ager Kabhi Mujhey Bhool Jaye To Kya Karoon

Kabhi Saath Tha Jo Ke Doo-ba-Doo Tha Humesha Mairey Hi Ru-ba-Ru
Jo Barrha Raha Tha Qadem Mairey Woh Hi Dagmaga jaye To Kya Karoon

Woh Charaagh-e-Dar Jo Jala Kabhi Main Bujha Chuka Hoon Magar Kabhi
Ke Bujha Huwa Bhi Diya Ager Maira Ghar Jalaye To Kya Karoon

Mainey Aks Tak To Mitta Diye Sabhi Aainey Bhi Chupa Diye
Tujhey Daikhta Koi Door Say Mairey Pass Aaye To Kya Karoon

Nahi mil raha hey yahaaN kaheiN meri zaat ka hi nishaaN mujhey


Nahi mil raha hey yahaaN kaheiN meri zaat ka hi nishaaN mujhey
sun aey jus’tuju dey jawaab tu ke ley aai hey ye kahaaN mujhey!

wo sabaq meiN parrh ke bhula chuka ke osool banatey heiN zindagi
mujhey mantaqi si daleel dey, ye muhawarey na suna mujhey

tujhey kya khabar meiN dil meiN dard, leeye phi raha hooN ajab ajab
teri mashq puraani hey yaar tu, kya ghaao dey ga naya mujhey

nahi kuch gila ke ye sab hey kya, bhaley kuch ajab hey ye maajra
ke merey aek jurm pe baar baar, koi dey raha hey sazaa mujehy

ye jo chaahatoN ke bazaar heiN yahaaN bik raha hey sabhi magar
yahaaN kon ley ga wafaa ki jins, bhala kya miley ga nafaa mujhey!

merey hum’nawa bhala meiN kahaN, terey waastey mujhey bhool ja
tu ney khuwahishoN ke aoraaq par, kaheeiN likh dia to mitta mujhey

yuN diye na rakh merey haath pe ke katteiN ge nahi phir raastey
kabhi rok leiN gi baarisheiN to kabhi tang karey gi hawaa mujhey

kattaa zindagi ka katthin safar, meiN muflisi meiN maraa magar
meiN gulshanoN ka makeen tha, zara khushbuweiN to laga mujhey

Ik diya dil main jalana bhi, bujha bhi dena,


Ik diya dil main jalana bhi, bujha bhi dena,
Yaad karna bhi usay roz, bhula bhi dena

Kya kahoon meri chaahat hai ya nafrat uski,
Naam likhna bhi mera, likh ke mita bhi dena

Phir na milnay ko bicharta hoon tujhse lekin,
Mud ke dekhoon to palatnay ki dua bhi dena

Khat bhi likhna usay maayoos bhi rehna us se,
Jurm karna bhi magar khud ko saa bhi dena

Mujh ko rasmon ka takalluf bhi gawaara lekin,
Jee main aaye to ye deewar gira bhi dena

Us se mansoob bhi kar lena puraanay Qissay,
Us ke baalon main naya phool saja bhi dena

Soorat-e-naqsh-e-qadam, Dasht main rehna Mohsin
Apnay honay se na honay ka pata bhi dena

usey barishoN ne chura lee’aa k wo badloN ka makeen tha


usey barishoN ne chura lee’aa k wo badloN ka makeen tha
kabi mur k ye bhi to dekhta k mera wajood he zameen tha

wo hi ek sach tha us k baad sari tohmatein jhoot heiN
mere dil ko pura yaqee’N hai wo mohabtooN ka ameeN tha

usey shoq tha k kisi jazeere pe us k naam ka phool ho
mujhe piyar karna sikha gay’aa mera dost kitna zaheeN tha

kabi sahiloN pe phiro gay tu tumheiN sippi’yaa’N hi bta’yeN gi
meri aa’nkh meiN jo simat gay’aa wohi ashk sab se haseen tha

merey ehsaas ka resham ulajh kar tootney ko hey


Suno…!
Mujhey ma’loom hey asaan lagta hey
tumheiN raaheiN badal lena
koi bhi moR muR jaana
kisi manzil ko tohkar maar kar waapis chaley aana
ya manzil ko faqat ik junbish-e-lab sey
buhat nazdeek le aana
mujhey maloom hey
buhat asaan hey tum ko palat jaana
merii tum be-bassi dekho
mujhey tum sey mohabbat k siwaa kuch nahi aata
magar iss meiN bhi kab koi qareena seekh paai meiN
ye dekho aankh rona chahti hey
phir bhi banjar hey
ye dekho haath kitney sard hein merey
ye dekho dil ki dharkan kis tarah
tarteeb khoh kar doobney ko hey
ye dekho mera aanchal haathoN sey phissal kar urr geya kab sey
ye dekho saans ki dorri bhi mujhsey chuhtney ko hey
merey ehsaas ka resham ulajh kar tootney ko hey
mujhey tou ye hunar bilkul nahi aata
k kaesey apney zakhmoN ko chuhpaatey heiN
ya kaesey dard ko darmaaN banaatey heiN
ya kaesi roothttei saansoN ka daaman
thaam kar waapis bulaatey heiN
buhat be-khaawab aur weeran mosam meiN
khafa neendoN ko kya kah kar manaatey heiN
mujhey ye hunar bilkul nahi aata
k kaesey apney mar jaaney pe nohey aap kartey heiN
yaa apney hi galey lag kar dilaasa kaesey bantey heiN
phir apni hi laash ko kaesey
kisi paayaab dariya…….
ya kisi adh-bujhi taaza chitaa meiN jhohnk detey heiN
ya phir aakaash ke neechey khula hi chohr detey heiN
mujhey tou ye hunar bilkul nahi aata
ke kaesey zard mousam meiN
kisi bhi sard aur be-dard mousam meiN
khushi ka aik bhi Ghuncha
bhala kaesey khilaatey heiN
ya kaesey aadhey rastey sey gharoN ko louT jaatey heiN
mujhey bilkul nahi aata
mujhey tum sey mohabbat ke siwa
( magar wuh bhi kahaaN aai )
koi hunar bilkul nahi aata..!!

Khiraaj-e-Aqeedat


 

abhi heiN zinda marey nahin hain
ke sard, jazbey parey nahin hain
abhi bhulaya nahin hey hum ney
yeh kal ki lagti hey baat goya
wuh aik ahl-e-nazar ke jis ney
alag watan ka tha khwaab daikha
aur aik azm o amal ka paikar
ke jis ki be-lous kaawishon ney
khwaab tabeer kar dikhaya
magar…..
na poochho ke is sehar mein
tha kitney taron ka khoon shamil
lutey thay maaoN key chaand kitney
huwi theen paimaal izzatein bhi
suhaag kitney ujar gaeye they

ye surkh lafzon ki daastaaN hey
lahu sey is ko raqam kia hey
magar hai yeh dastaan adhoori
abhi kuch abwaab reh gaeye hain
ke jin ki takmeel ho rahi hey
chanaar sholay ugal rahey hain
wafa ke chashmey ubal parey hain
yeh sab shaheedon ka qaafla hey
kisi ke rokey kahin ruka hey ?
azal sey ta ba-abad hey jaari
isi mein muzmir baqa hamari

soo-e-adam hans ke jaaney walo
tumhein hamara salaam pohnchey
nishaan-e-baatil mitaney walo
tumhein hamara salaam pohnchey
diye wafa ke jalaney walo
tumhein hamara salaam pohnchey

Larzish lahu ko


 

 

 

 

Larzish lahu ko dard ki zebae daay mujhay
Tu khuwaab hai.. tu harf ki ra’naae day mujhay

Chaltay maain apni chaap ko .. raston maain sunn sakon
Itni tu She’har e Hijar maain tanhae daay mujhay

Phirta hon .. boondh boondh .. gohar ki talaash maain
In panion maain seep ki sachaee day mujhay

Sab aks roshni ki chaka-chond lay gae
Kholi ha .. maain na ankh tu .. beenae day mujhay

 

 

tujh ko darya ne jo dekha hai idhar atay huay


tujh ko darya ne jo dekha hai idhar atay huay
kuch bhanwar doob gaye aab main chakratay huay

hum ne to raat ko daanto’n se pakar rakha hai
chheena jhapti main ufaq khulta gaya jatay huay

jhhap se utar jaati hai paani main gulnaar shafaq
surkh ho jatay hain rukhsaar bhi sharmatay huay

main na hoon ga to khizaan kese katay gi teri
shokh pattay ne kaha shaakh se murjhatay huay

hasratain apni bilaktee’n na yateemo’n ki tarah
hum ko awaz he de letay zara jatay huay

see leay hont wo pakeeza nigahain sun ker
meli ho jati hai awaz bhi dohratay huay

(Gulzar)

Mujhay kuch dair sonay day


Suno!
Main thak gaya hoon
Meri Palkoon pe ab tak kuch adhooray khawaab jaltay hain
Meri neendoon main tairay wasl ka raisham ulajhta hai
Mairay ansoo mairay chehray pe tairay ghamm ko likhtay hain
Mairay ander kai sadiyun kay sannatoon ka daira hai
Maiary alfaaz baahain wa kiya mujh ko bulatay hain
Mager main thakk gaya hoon
Aur main ne khamashi ki goad main sir rakh dia hai

Main baloon main
Tumharay hijr kee narm ungliyan mehsoos kerta hoon
Meri palkoon pe jaltay khawaab hain ab raakh kee soorat
Tumharay wasl ka raisham bhee ab neendain nahin bunta
Mairi aankhon main jaisay THAR kay mausam ka basaira hai
Mujhay ander kay sannatoon main gehri neend aai hai
Suno!
Iss yaad se keh do
Mujhay kuch dair sonay day

Meri palkon ko mat daikho


 

Meri palkon ko mat daikho

in ka uthna, in ka jhapakna

jism ka na mehsoos amar hai

 

meri ankhon ko mat daikho

in ki aut main shaam-e-ghareeban

in ki aarr main dasht-e-azal hai

 

mere chehray ko mat daikho

iss main koi wada-e-farda

iss main koi aaj na kal hai

 

ab us darya tak mat aao

jis ki lehrain toot chuki hain

uss seenay se lau na lagao

jis ki nabzain choot chuki hain

 

ab mere qatil ko chaho

mera qatil marham marham

darya darya, saahil saahil

 

qazi-e-shehr ka matha chomo

jis ke qalam main zehr-e-hilahil

jis ke sukhan main lehn-e-silasil

ab  us raqs ki dhun par nacho

jis ke gat per lut gaya qazi

jis ki lai par bik gaya qatil

bik gaya qatil !!!!!!!

Rishta’-e- JaaN


Rishta’-e- JaaN

Ussey meiN saans kehti thi
magar saanseiN humesha sey mujhey mushkil hi lagti hein

ussey meiN Zindagi kah kar bulaati thi
magar ye zindagi kuch ba-wafa hoti tou wuh bhi phir wafa karta

ussey Dil bhi kaha meiN ney
magar ye Dil zara sii Theis paa kar apni hasti bhool jaata hey

ussey Ehsaas ki Khushbu bhi likha tha
magar Khushbu ka koi ghar …..nahi hota

ussey meiN deep kahti thi
magar Zaalim hawaa sey dosti meri kahaaN mumkin

ussey meiN ney Sitaara bhi kahaa ik Shab
magar aankhoN meiN koi aasmaaN hota tou wuh in meiN utarta bhi

ussey ik din kahaa meiN ney………suno tum Chaand jaesey ho
magar meiN khud ko saagir………….. kis tarah karti?

ussey meiN ney kahaa baadal
magar Sehra ki qismat meiN kabhi baarish nahi hoti

ussey meiN ney maseeha bhi tou jaana thaa
magar zakhmoN ki had hoti…..tou wuh darmaaN koi karta

ussey meiN ney kaha suraj
magar meiN moum thii…uski tamazat kis tarah sehti

ussey meiN ney Dua kah kar pukaara tha
magar meri duaaoN ko, dar-e-maqbool tak janey ka rasta hi nahi aata

phir ik din jaaney kaesey…….?
dard mosam likh diyaa ussko
issi mosam sey ab mera
ta’aluQ Umr bhar ka hey
wafaa ki har kasoTi par….ussey iss Dil ney parkha hey

kabhi tum laut ke aao


kabhi tum laut ke aao
mujhay bus itna samjhao
kahan se seekh li tum ne,
ada mujh ko bhulane ki

tumhain mujh se jo shikwa tha
ya koi bhi shikayat thi
na ki koshish batanay ki
bhala yun chor ke apna
koi apnon ko jata hai

musalsal dukh ki barish main
yun jeevan bhar rulata hai
abhi tau rait geeli hai
banay apnay gharondon ki
abhi sub naqsh baqi hain
gaye qadmon pe laut aao

mujhay bus itna samjhao
kahan se seekh li tum ne
ada mujh ko bhulanay ki

chand ash’aar


Nahin fursat yaqeen mano hamain kuch aur karne ki

teri baatain, teri yadain, bohot masroof rakhti hain

—————————–

tumhain jo be sabab mujh se khafa honay ki aadat hay,

ye aghaz-e-judai hai ya andaz-e-muhabbat hay

————————-

faqat kehne ki batain hain nibhata kon hay kis ko

chalo ab dekh letay hain manata kon hai kis ko !

Tu Is Qadar Mujhe Apne Kareeb Lagta Hai


 

 

 

Tu Is Qadar Mujhe Apne Kareeb Lagta Hai
Tujhe Alag Sa Jo Sochun Ajeeb Lagta Hai

Hadood-E-Zaat Se Bahar Nikalke Dekh Zara
Na Koi Gair, Na Koi Raqeeb Lagta Hai

Jise Na Husn Se Matlab Na Ishq Se Sarokar
Wo Shakhs Mujhko Bahut Badnaseeb Lagta Hai

Ye Dosti, Ye Marasim, Ye Chahatein Ye Khaloos
Kabhi Kabhi Ye Sab Kuch Ajeeb Lagta Hai

Ufaq Pe Door Chamakta Hua Koi Taara
Mujhe Charag-E-Dayaar-E-Habeeb Lagta Hai

Na Jaane Kab Koi Tufaan Aayega Yaaron
Buland Mauj Se Saahil Qareeb Lagta Hai

ab bhala chhor k ghar kia kartay


 

 

ab bhala chhor k ghar kia kartay
Shaam k waqt safar kia kartay

Tairi masroofiyatain jantay thay
Apnay aanay ki khabar kia kartay

Jab sitaaray hi nahi mil paaey
Lay k hum Shams- o- Qamar kia kartay

Woh musafir hi khuli dhoop ka tha
Saaey phaila k shajar kia kartay

Khaak hi awwal-o-aakhir thehri!!!
Kar k zarray ko gohaar kia kartay

Raaey pahlay sy hi bana li tu nay
Dil main aab hum tairy ghr kia kartay

Ishq nay saaray saleekay bakhshay
Husan say kasb-e-hunar kia kartay

 

(Parveen Shakir)

Phir payar kise tum kehte ho !


Phir payar kise tum kehte ho!
Khamosh zuban k lafzon men
Kuch poshida si baten hen
In poshida se baton men
Kuch chahat ki barsaaten hen
In baton ko hum mudaat se
Seene men chupa k bethe hen
Kuch pae bina
Kuch kho dena
Ye payar men hum ne seekha hy
Soraj men chand sitaron men
Har shay men tumhi ko dekha hy
Dharkan men b naghma ban kar
Sagar ki tarha tum behte ho
Ye payar nahi to tum hi kaho
Phir payar kise tum kehte ho !

Akhan cham cham – tina sani


 

 

 

Ankhan cham cham wasiyan
Dilan dian galan dilan wich reh gayan wey,
Na tu sunian, na dasian
Ankhan cham cham wasiyan
Nikee jaiee jindaree noo rog kee ae la liya
Channa pardaisian noo meet kyon bana liya
Sochan wich dubhe howee Wang main sadayan wey
Kadee rowein, kadee hansian
Ankhan cham cham wasiyan
Kairee gal mahia wey tu mukh san tow moria
Dil sada gumman dey samandaran che roria
Aisey dil chundrey dey akhey kano lug ke
Dukhan witch main phasian

Ankhan cham cham wasiyan
Tu na jadoo pas channa, kee ae saday pas ve
Din wee udas saday, raatan vi udas ve
Lut giyan chain sada, Rus gaye hasay ve
Khushian ne door nasiayan

Ankhan cham cham wasiyan ..

Dasht-e-tanhai maen


 

 

Dasht-e-tanhai maen aye janey jahan larzaan haen
teri awaaz k saye terey honton k sarab
Dasht e tanhai maen doori k khaso khak taley
Khil rahey haen terey pehloo k samaan aur gulab
Dasht-e-tanhai maen …….
Uth rahi hae kaheen qurbat sey teri saans ki aanch
Apni khushboo maen sulagti hui madham madham
Door ufaq par chamakti hui qatra qatra
Gir rahi hae teri dildar nazar ki shabnam
Dasht e tanhai main…..
Is qadar piyar sey aye jan e jahan rakha hae
Dil k rukhsar pe is waqt teri yaad ney haath
yeun guman hota hae gar che abhi hae subh faragh
Dhal gaya hijr ka din aa bhi gai wasal ki raat
Dasht tanhai main…..